НАТОнун тышкы иштер министрлери 3-апрелде Брюсселге эки күндүк жыйынга чогулушат. Алар бул жолу АКШ Европа мамлекеттерине коргонууга көбүрөөк каражат жумшоого басым кылып жатышын эске алуу менен альянстын коргонуу мүмкүнчүлүктөрүн чыңдоо маселесин талкуулашат.
НАТОнун баш катчысы Марк Рюттенин айтымында, "жыйын альянстын жалпы коопсуздугу үчүн өтө маанилүү убакытта өтөт". Ал кошумчалагандай, учурда уюмга мүчө ар бир мамлекетти "чочуткан чакырыктар жаңырууда".
Рютте АКШнын президенти Дональд Трамптын буга чейинки сынына карабай, Кошмо Штаттар альянска берилгенин белгиледи.
Жыйынга АКШнын мамлекеттик катчысы Марко Рубио, Украинанын тышкы иштер министри Андрей Сибига жана Евробиримдиктин тышкы саясат боюнча башкы комиссары Кая Каллас катышары күтүлүүдө.
Андан тышкары Американын НАТОдогу жаңы дайындалган элчиси Мэтт Уитакер да кошулмакчы.
Учурда Украинанын НАТОго мүчө болушу тууралуу маселе күн тартибинде жок болсо да, көпчүлүк европалык өнөктөштөр Кошмо Штаттардын курал-жабдыгынын Украинага жеткирилиши боюнча кепилдик алууга аракет кылышууда.
Шерине