Италиялык ойчул, даанышман, аскердик-теоретикалык эмгектердин автору жана жазуучу Николло Макиавеллинин "Өкүмдар" трактаты кыргыз тилине которулду.
1513-жылы жазылган эмгекте бийликке жетүү айла-амалы, мамлекетти башкаруу, лидерге таандык саясий шык-жөндөмдөр тууралуу сөз болот.
Bugupress басма үйү миң нускада чыгарган китепти Феруза Шерматова которуп, публицист Жыргалбек Касаболотов менен саясат талдоочу Эмилбек Жороев редакциялаган. Китепти басып чыгарууга Самат Исманов демөөрчүлүк кылган.
Аталган басма үйүнүн жетекчиси Жаныбек Абидетегин дүйнө классикасына айланган бул китеп менен кыргыз окурмандары эне тилинде таанышууга тийиш деген пикирде.
"Өзгөчө коомдук, саясий аң-сезимимибизди өстүрүү үчүн дүйнөлүк тажрыйбаларга, маалыматтарга, тарыхый булактарга муктажбыз. Аристотел, Ибн Халдун, Платон, Жан-Жак Руссо, Никколо Макиавелли жана башка көптөгөн чыгыш-батыш ойчулдарынын эмгектери кыргыз тилинде окулуп, эл арасында талкууланышы керек. Буга чейин дүйнөлүк ойчулдардын эмгектерин биздин интеллигенция башка тилде окуп, бирок кыргызча талкуулап өстү. Фольклор менен эле чектебей, эне тилде дүйнөлүк илимий китептерди окуйлу", - дейт Жаныбек Абидетегин.
Макиавеллинин философиясы күчтүү жана калыс мамлекетти түзүүнү жактап, ага кызмат кылуу атуулдардын башкы максаты болушу керек дейт. Флоренцияны 20 жыл башкарган Лоренцо Медичиге арналган трактат Макиавеллинин көзү өткөндөн кийин, 1532-жылы жарык көргөн.
"Өкүмдар" - дүйнөдөгү авторитардык лидерлерге жаккан эмгек катары сыпатталып келет. Макиавелли бийлик табияты кандай болорун көрсөткөнү үчүн трактат саясат таануу илимине кызыккандар окуй турган китептердин тизмесине кирген. (ST)
Шерине