Израилдин премьер-министри Биньямин Нетаньяху Эл аралык кылмыш сотунун ордерине карабай, 3-апрелде Венгрияга барды. Бул анын Европага 2023-жылдан берки биринчи сапары.
Нетаньяхуну Будапешт аэропортунда Венгриянын коргоо министри Кристоф Салай-Бобровницки тосуп алды.
Камакка алуу ордери болсо да Нетаньяху Будапештте кармалбай турганы дээрлик анык болчу. Себеби Венгриянын премьер-министри Виктор Орбан ноябрда эле Нетаньяхуну расмий түрдө чакырып, анын коопсуздугуна кепилдик берерин билдирген.
"Эгер ал келсе мен анын бул жерде бардык көйгөйдөн оолак кармап, коопсуздугун камсыз кылам", - деген эле ал.
Ал арада дипломатиялык булактар Венгрия Эл аралык кылмыш сотунан чыгууну чечкенин билдиришти. Бирок бул маалымат расмий түрдө бышыктала элек.
Орбан Нетаньяху менен жана АКШнын президенти Дональд Трамп менен тыгыз кызматташып келет.
Трамп да Эл аралык кылмыш сотунун Нетаньяхуну камоо ордерине каршы чыгып, аны "негизсиз" деп сыпаттаган жана сотко каршы санкция киргизген.
Гаадагы сот айыптоо корутундусунда Нетаньяху "согуштук кылмыштарга жана адамзатка каршы кылмыштарга", анын ичинде "калкты ачарчылыкка учуратуу, жайкын тургундарга кол салуу, өлтүрүү, куугунтуктоо жана адамзатка каршы башка ырайымсыз иш-аракеттер" үчүн жооптуу деп айыпталган.
Венгрия Рим статутун 2001-жылы ратификациялаган. Эл аралык кылмыш соту өзү эч кимди камай албайт. Анын ордерин аткаруу Рим статутуна кол койгон өлкөлөргө көз каранды.
Шерине