Бишкектеги Панфилов паркында болгон кырсыкка байланыштуу аттракциондун 24 жаштагы кызматкери кармалып, шаардык милициянын убактылуу кармоочу жайына киргизилди. Бул тууралуу Биринчи май райондук ички иштер башкармалыгынын басма сөз кызматы кабарлады.
Бул окуя боюнча Кылмыш-жаза кодексинин “Керектөөчүлөр үчүн коркунуч түзүү” беренеси менен кылмыш иши козголгон.
31-мартта Панфилов атындагы сейил багында 19 жаштагы кыз аттракциондон кулап кеткен. Ал оор абалда Бишкек шаардык Тез жардам клиникалык ооруканасына жаткырылган. Бишкек шаардык мэриясы аттракцион айланып жатканда коопсуздук куру үзүлүп кеткенин билдирген.
Жаратылыш ресурстары, экология жана техникалык көзөмөл министрлиги 35 миң сом айып салып, Панфиловдогу бардык аттракциондорду убактылуу жапты.
Бул окуядан кийин Министрлер кабинетинин төрагасы Адылбек Касымалиев Кыргызстанда коопсуздук талаптарына жооп бербеген аттракциондордун ишин токтотуу тапшырмасын берди. Ага ылайык, Жаратылыш ресурстары, экология жана техникалык көзөмөл министрлиги адам өмүрүнө жана ден соолугуна коркунуч жараткан аттракциондордун ишин токтотуунун тартибин иштеп чыгышы керек. (BTo)
Шерине