АКШ президенти Дональд Трамп эгер Москва Украинада ок атышпоо келишимине макул болбосо, “Путиндин бардык мунайына” бажы төлөмдөрүн киргизүүгө даяр экенин дагы бир ирет билдирди. Бул тууралуу ал 31-мартта журналисттер менен жолугушууда айтты. Видеону Bloomberg басылмасы жарыялады.
"Мен анын ишти аягына чыгарарына ынангым келет жана менимче ал аны аткарат", - деди Трамп.
Трамп Путин тууралуу суроого жооп берип жатып "Мен анын мунайына экинчи жолу тарифтерди киргизгим келбейт, бирок ал өз ишин аткарбай жатканына көзүм жетсе, анда мындай кадамга барам" деди.
АКШнын лидери орус президенти тезирээк ок атышууну токтотуу тууралуу чечимди кабыл алышын каалай турганын белгиледи.
Трамп 30-мартта эгер Орусиянын лидери Владимир Путин анын Украинадагы согушту токтотуу аракеттерине тоскоолдук кылса Орусиянын мунайына 25-50% кошумча тариф киргизерин билдирген.
NBC телеканалына Трамп Путиндин Украинада убактылуу өкмөт түзүү чакырыгына "өтө ачууланганын" жана "кыжыры келгенин" айткан.
Трамп мындай чаралар бир ай ичинде ишке ашарын, эгерде согушту токтотуу боюнча келишим кабыл алынбай калса дароо күчүнө кирерин билдирди.
АКШ президенти мындай эскертүүнү Вашингтон Украина жана Орусия менен Кара деңизде аскердик аракеттерди токтотууну макулдашкандан кийин жасады. (AiA)
Шерине