Президенттин иш башкармалыгынын башчысы Каныбек Туманбаев Чыңгыз Айтматов проспектисин кеңейтүү иши президент Садыр Жапаровдун тапшырмасы менен жүрүп жатканын билдирди. Бул тууралуу ал 31-мартта Бишкекте журналисттердин суроолоруна жооп берип жатып айтты.
“Биз ал жерге “Ынтымак ордону” курдук, өкмөттүк трасса бар. Ошондой эле быйыл бизге бир топ чет элдик делегациялар келет. Ал эми кийинки жылы 19 өлкөнүн президентин күтүп жатабыз. Биз ШКУнун (Шанхай кызматташтык уюму) саммитин өткөрөбүз. Ушул тапта “Ынтымак ордонун” маңдайына конгресс-холл, конок үйлөрдү куруп жатабыз”, - деди ал.
Чыңгыз Айтматов проспектисин 4,5 метрге чейин кеңейтсе болорун, Бишкектин 1970-жылдардагы башкы планында жол кеңейтилет деген жерлер кызыл сызыкка киргенин кошумчалады.
Бишкек шаарынын мэри Айбек Жунушалиев Чыңгыз Айтматов проспектисин кеңейтүү ишинин алкагында Киргизия конушундагы 66 үйдүн дубалынын бир бөлүгүн бузуу пландалып жатканын билдирген.
Конуштун тургундары мэриянын аракетин мыйзамсыз деп баалап, жеке менчик укугу бузулуп жатканын билдирип чыгышкан.
Мэрия Чыңгыз Айтматов проспектиндеги автоунаа жолун кеңейтип, алты тилкелүү трасса курууну, четине велосипед тепкендер үчүн өзүнчө жол жана тротуар курууну пландап жатат.
Бишкектин түштүк бөлүгүндө, мамлекеттик резиденцияга жакын жайгашкан “Ысык-Көл” мейманканасы 2021-жылдын аягында бузулуп, анын ордуна “Ынтымак ордо” деп аталган президенттин администрациясы 2024-жылы август айында ишке берилген. Азыр мамлекет башчы жана анын аппараты ушул имаратта иштейт. (BTo)
Шерине