Казакстанда социалдык тармактарда оюн-зоок өткөргөн блогерлерге айып пул салынарын коңшу өлкөнүн улуттук экономика министринин орун басары Серик Жумангарин парламентте билдирди. Бул тууралуу “Информбюро” басылмасы жазып чыкты.
Маалыматка караганда, социалдык тармактарда мындай оюндарды өткөрүү мыйзамсыз экендиги тууралуу казак блогерлерине түшүндүрүү иштери жүргүзүлүп жатат. Аткаминер мыйзам бузууларды аныктоо үчүн Казнетте күнү-түнү мониторинг жүргүзүлүп жатканын кошумчалады.
Ошондой эле тиешелүү мыйзамдарга ылайык, «Сатти Жулдыз» акционердик коомунан башка операторлорго оюн өткөрүүгө тыюу салынганы айтылды. Аталган акционердик коом Казакстанда 15 жылдан бери лотореяларды уюштуруп келет.
Оюн бизнесин жана лотереяларды жөнгө салуу комитети мыйзамсыз уюштуруучуларды жоопкерчиликке тартууга жооптуу болот.
Тартип бузгандар кирешесин конфискациялоо менен 7,8 миллион теңгеге (15600 доллар) чейин айыпка жыгылат.
Өкмөттүн маалыматына караганда, жыл башынан бери мониторингдин жыйынтыгында 1870 интернет алдамчылык фактысы аныкталган. Анын ичинен 389 факты социалдык тармактарда, 1480 жабык ресурстарда аныкталган. Онлайн казинолордун ишмердүүлүгү боюнча 8616 факты катталып, анын ичинен 6399 факты социалдык тармактарда, 2195 интернет-ресурстарда экени аныкталды.
2024-жылдын февраль айынан бери жогорудагы мыйзамга ылайык, 113 адам жоопкерчиликке тартылып, айып пулдун жалпы суммасы 50 миллион теңгеден (99 миң доллар) ашты.
2023-жылдан бери Казакстандын мыйзамдарына “жалган маалымат таратканы үчүн” жаза каралган берене киргизилген. Бул берене менен негизинен блогерлерге жана журналисттерге карата админстративдик иштер ачылат. (AiA)
Шерине