Бүгүн, 31-мартта CASA-1000 долбоорунун алкагында курулган Датка-Согд 500 кВ электр чубалгысы ишке берилди.
Энергетика министрлигинин маалыматында чубалгынын узундугу 485 чакырым.
Датка-Согдини ишке киргизүү аземине Садыр Жапаров менен Эмомали Рахмон видеоконференция аркылуу катышып, демонстрациялык рычагды биргеликте басышты. Кыргызстан менен Тажикстандын президенттери учурда Кожент шаарында жолугушуп жатат.
Чубалгыны ачуу үчүн Баткенге барган энергетика министри Таалайбек Ибраев Датка-Согд кыргыз энергетикасын өнүктүрүүгө чоң өбөлгө экенин белгиледи.
"Бул линия менен келечекте Ооганстан, Пакистан өлкөлөрүнө электр энергиясын экспорттоого чоң мүмкүнчүлүк түзүлөт” - деди Ибраев.
CASA-1000 эл аралык долбоору Кыргызстан менен Тажикстандан электр энергиясын экспорттоо, Борбордук жана Түштүк Азиянын энергетикалык интеграциясына өбөлгө түзүү максатында ишке кирген.
Кыргызстанда бул долбоорду “Кыргызстан улуттук электр тармагы” ААК ишке ашырса, куруу иштерин эл аралык тендердин жыйынтыгында тандалган MİTAŞ түрк компаниясы аткарган.
Маалыматка ылайык, жалпы узундугу 485 чакырым Датка-Согд аба чубалгысынын 456 чакырымы Кыргызстандын аймагынан өтөт. Датка көмөк чордонунда атайын курулган 500 кВ уячадан баштап Жалал-Абад, Ош жана Баткен облустары аркылуу Тажикстандын чек арасына чейин 1243 тирөөч орнотулган.
CASA-1000дин алкагында Кыргызстандын жамааттарды өнүктүрүү жана инвестициялоо агенттиги (АРИС) Ош, Жалал-Абад жана Баткен облустарындагы 77 калктуу конушта (36 айыл аймакты жана 5 шаар) Жергиликтүү жамааттарды колдоо долбоорун ишке ашырган.
Ага ылайык, 11 миллион доллар каржылоо суммасы электр энергия менен камсыздоону, социалдык инфраструктураны жакшыртуу жана киреше алып келе турган объектилерди каржылоо боюнча долбоорлорго жумшалган.
CASA-1000 долбоору Кыргызстан, Тажикстан, Ооганстан жана Пакистанды камтыйт. Анын баштапкы этабын бир нече эл аралык донор 2014-жылы жактырган. 2016-жылы ошол кездеги президент Алмазбек Атамбаев CASA-1000 долбоорун аткаруу боюнча мыйзамга кол коюп, чечим 2018-жылдан баштап күчүнө кирген.
Ага ылайык, курулушту ишке ашыруу үчүн Кыргызстан Дүйнөлүк банкка караштуу Эл аралык өнүктүрүү ассоциациясынан 38,25 миллион доллар, Европа инвестициялык банкынан 70 миллион евро жана Ислам өнүктүрүү банкынан 50 миллион доллар насыя алмак.
Ошол учурда кыргыз өкмөтү долбоорго республикалык бюджеттен кошумча каражат каралбай турганын, эл аралык каржы уюмдарынан алынган 233 миллион доллар гана жумшаларын билдирген. Долбоордун жалпы наркы 1,17 млрд долларга бааланган.
Тажикстан долбоор алкагында өз аймагында курулуучу линияларды 2016-жылы сала баштаган. Кыргызстандагы линиялардын курулушу 2021-жылдын апрелинде жанданган. (ST)
Шерине