Баткен жана Лейлек райондорунда ипотекалык шартта бериле турган 49 турак үй курулат. Бул боюнча Мамлекеттик ипотекалык компаниясы, Баткен облустук курулуш жана инженердин инфраструктура башкармалыгы менен Ак-Сай айыл аймагы 15-июнда кол койду.
Президенттин Баткен облусундагы өкүлчүлүгү билдиргендей, турак жайлардын жери 12 сотыхтан болот. 20 турак үй Баткен районундагы Ак-Сай айыл аймагына, 29у Лейлектеги Кулунду айыл аймагына курулат.
“Мамлекеттик ипотека 25 жылга 4% менен берилет. Бул үйлөрдү турак жайы жок, муктаж жарандар ала алат”, - деп айтылат маалыматта.
Үйлөрдүн курулушу быйыл күзүндө башталып, 2024-жылы пайдаланууга берилери кабарланды.
Өткөн жылдын сентябрындагы чек ара чырында Баткендин бир катар айылдары талкаланып, өрттөлгөн, ондогон адамдар каза болгон, миңдеген жергиликтүү тургун үй-жайын таштап качууга мажбур болгон. Ипотекалык үйлөр салына турган Ак-Сай менен Кулунду да кыргыз-тажик чек арасында жайгашкан.
Өкмөт чек арадагы айылдарда ураган, өрттөлгөн үйлөрдүн ордуна салынып жаткан 417 турак жайдын курулушу аяктап калганын билдирди.
