Кыргыз цирки: кыбыраган кыр ашат

Маданияттын башка тармактарына салыштырмалуу цирк артисттери жашоосун тобокелге салып иштегени менен айырмаланышат. Маселен, жапайы жаныбарлар менен иштөө, аба гимнастикасында коопсуздугун камсыздоочу нерселерди колдонбой аткарууда жашоого коркунуч туудуручу тобокелдер көп болот. Кыргыз цирки Тарых жана маданият жылына карата Чүй облусунун жана Бишкек шаарынын тургундары үчүн атайын программаларды уюштурушкан. Андан соң бүткүл Кыргызстан боюнча турне өткөрүп, цирк артистеринин өнөрлөрүн тартуулашмакчы. Өлкө боюнча бир гана цирк болгондуктан дубандарда аба гимнастикасынан башка, бардык жанрлардын түрлөрүн көрүүчүлөргө сунушташмакчы. Турне алдында "Азаттык" алардын даярдыгы жана цирктин абалы менен таанышып келди.