Վրաստանի նախագահ Միխեիլ Կավելաշվիլին ապրիլի կեսերին կայցելի Ադրբեջան, ապա Հայաստան, տեղեկացրել է Վրաստանի նախագահի միջազգային հարաբերությունների հարցերով խորհրդական Լուկա Էխվայան։
Վերջինս հայտնել է, որ Կավելաշվիլիի առաջին արտասահմանյան այցն Ադրբեջան տեղի կունենա ապրիլի 14-ից 15-ը, այնուհետև Հայաստան՝ հավանաբար ամսվա վերջին։
«Օրերը դեռ որոշված չեն», - ասել է խորհրդականը։
«Վրացական երազանքի» կառավարության ղեկավար Իրակլի Կոբախիձեն 2024 թվականի ընտրություններից հետո արդեն երկու անգամ այցելել է Հայաստան և Ադրբեջան։ Նա մարտի 20-ին Երևանում ներկա է գտնվել Հայաստանի և Վրաստանի ֆուտբոլի հավաքականների հանդիպմանը, ապա մարտի 23-ին Հայաստանի վարչապետ Նիկոլ Փաշինյանը Թբիլիսիում ներկա եղավ երկու երկրների ֆուտբոլի ազգային հավաքականների խաղին, առանձնազրույց ունեցավ Կոբախիձեի հետ, քննարկեցին Հայաստան-Վրաստան ռազմավարական հարաբերությունների հարցեր, տարածաշրջանային նշանակության այլ թեմաներ:
Թբիլիսին բազմիցս պատրաստակամություն է հայտնել՝ նպաստելու Հարավային Կովկասում խաղաղության և կայունության հաստատման գործընթացին:
Վրաստանի արտաքին քաղաքական գերատեսչության ղեկավարը հունվարին Երևանում հայտարարել էր, որ Թբիլիսին ցանկանում է տեսնել տարածաշրջանը խաղաղ՝ նշելով, որ պատրաստ են անել հնարավորը՝ այդ նպատակին հասնելու համար, անգամ հանդես գալ որպես ֆասիլիտատոր՝ տարածաշրջանում խաղաղությունն ու կայունությունն ամրապնդելու համար։
