Հայաստանի արտգործնախարար Արարատ Միրզոյանն այսօր հեռախոսազրույց է ունեցել իր վրացի պաշտոնակից Մակա Բոճորիշվիլիի հետ: ԱԳՆ-ից փոխանցում են, որ նրանք բացի երկկողմ օրակարգը, խոսել են նաև տարածաշրջանային հարցերի շուրջ:
Արարատ Միրզոյանը և Մակա Բոճորիշվիլին անդրադարձել են Հարավային Կովկասում խաղաղության և կայունության ապահովման ուղղությամբ քննարկումներին։
Նույն օրը Վրաստանի արտգործնախարարը զրույցում է ունեցել նաև Ադրբեջանի ԱԳ նախարար Ջեյհուն Բայրամովի հետ: Այդ երկրի ԱԳՆ-ից հաղորդում են, որ քննարկվել են երկու երկրների համագործակցությունը, ինչպեց նաև տարածաշրջանային հարցերը:
Այլ մանրամասներ չեն հաղորդվում:
Ավելի վաղ Թբիլիսին վերահաստատել էր իր պատրաստակամությունը՝ նպաստելու Հարավային Կովկասում խաղաղության և կայունության հաստատման գործընթացին:
Վրաստանի արտաքին քաղաքական գերատեսչության ղեկավարը Երևանում հայտարարել էր, որ Թբիլիսին ցանկանում է տեսնել տարածաշրջանը խաղաղ՝ նշելով, որ պատրաստ են անել հնարավորը՝ այդ նպատակին հասնելու համար, անգամ հանդես գալ որպես ֆասիլիտատոր տարածաշրջանում խաղաղությունն ու կայունությունն ամրապնդելու համար։
