Բաքուն սահմանային կրակոցներին զուգահեռ վերսկսել է հայկական կողմին մեղադրել իր դիրքերը թիրախավորելու համար։ Ընդ որում՝ Ադրբեջանի պաշտպանության նախարարությունն այսօր արդեն պնդում է, թե հայկական կողմը կրակ է բացել նաև Սյունիքի մարզի Խնածախի ու Խոզնավարի դիրքերից։ Երևանը, մինչդեռ, այսօր ևս հերքել է Բաքվի մեղադրանքները։
«Ադրբեջանի ՊՆ հաղորդագրությունը, թե իբր մարտի 31-ի ժամը 17։00-ից մինչև ապրիլի 1-ի ժամը 04։45-ն ընկած ժամանակահատվածում ՀՀ ԶՈՒ ստորաբաժանումները կրակ են բացել սահմանագոտու արևելյան և հարավարևելյան հատվածներում տեղակայված ադրբեջանական դիրքերի ուղղությամբ, չի համապատասխանում իրականությանը», - ասված է ՀՀ Պաշտպանության նախարարության հայտարարության մեջ։
Սյունիքի մարզի սահմանային երկու գյուղերից՝ Խնածախից ու Խոզնավարից տեղացիներն արդեն ավելի քան 10-ն օր է՝ հաղորդում են Ադրբեջանի զինուժի կրակոցների մասին։ Եվ միայն երեկ Հայաստանի պաշտպանության նախարարությունը հաստատեց, որ Ադրբեջանի զինուժը կրակ է բացել Խնածախի ուղղությամբ։ Ռազմական կառույցը հրապարակել է լուսանկարներ, որոնցում երևում է կրակոցներից վնասված բնակելի տան պատուհանը։ Վարչական ղեկավար Սերյան Միրզոյանը «Սիվիլնեթին» ասել է, որ գնդակոծությունը թիրախավորված է եղել, իր տունն է վնասել։
«Ընդհանուր թիրախավորված կրակ է եղել խաղաղ բնակչության վրա, որից մեկն էլ բաժին է հասել մեզ», - ասել է նա:
Խնածախում մարդիկ երկեկվա կրակոցներից ավելի են տագնապել։ «Լարված ենք, էդ տենց ա, բայց բոոր դեպքերում էլի մենք ավելի ամուր ենք, քան նրանք», - պնդեցին տեղացիները:
Խնածախից Կամելա Օհանյանն «Ազատությանը» պատմեց, որ ադրբեջանական դիրքերից կրակոցները շարունակվել են նաև անցած գիշեր։ Ասաց՝ միայն թե մի փոքր շուտ են սկսել: Գյուղացիների խոսքով՝ ադրբեջանցիները գիշերը հենց 10:20 են սկսում՝ կրակում ճիշտ պարբերականությամբ մինչև լուսաբաց։
Խնածախին հարևան՝ Սյունիքի մյուս սահմանային գյուղում՝ Խոզնավարում ևս գիշերն առանց կրակոցների չի անցել։ Վարչական ղեկավարն «Ազատության» հետ զրույցում պատմեց, որ երեկվանից են կրակոցները վերսկսվել, նախորդ 2 օրերին կրակոցներ, ըստ Վահան Զաքյանի, չեն եղել։
Մինչ ադրբեջանական դիրքերով շրջապատված գյուղացիները սպասում են՝ իշխանությունը քայլեր ձեռնարկի՝ կանխելու նման դեպքերը, Հայաստանի պաշտպանության նախարարը հայտարարել է, որ դիվանագիտությամբ է տեսնում խնդրի լուծումը։ Մինչդեռ Բաքուն շաբաթներ շարունակ անտեսում է խաղաղության պայմանագիրը ստորագրելու հայկական կողմի առաջարկը։ Ադրբեջանական կողմը փաստաթուղթը ստորագելու համար պահանջներ է առաջ քաշում՝ ԵԱՀԿ Մինսկի խմբի լուծարում ու Հայաստանի Սահմանադրության փոփոխություն։
