Բաքուն շարունակում է հրադադարը խախտելու մեղադրանքներ հնչեցնել Երևանի հասցեին։ Այս անգամ Ադրբեջանի ռազմական գերատեսչությունը հայտնել է, թե մարտի 31-ին՝ ժամը 17:00-ից մինչև ապրիլի 1-ը, ժամը 04:45-ը, Հայաստանի զինված ուժերի ստորաբաժանումները Շորժայի, Խոզնավարի, Վարդենիսի, Գորիսի դիրքերից ընդմիջումներով կրակել են ադրբեջանական բանակի դիրքերի ուղղությամբ։
Հայաստանի պաշտպանության նախարարությունը հերքել է սահմանագոտու արևելյան և հարավարևելյան հատվածներում տեղակայված ադրբեջանական դիրքերի ուղղությամբ կրակ բացելու մեղադրանքները՝ նշելով, որ պնդումները չեն համապատասխանում իրականությանը։
Նախօրեին էլ Բաքուն նման երկու հաղորդագրություն էր տարածել, հայկական կողմը ևս հերքել էր դրանք՝ նշելով, որ հենց ադրբեջանական կողմն է խախտել հրադադարը, կրակել Սյունիքի մարզի Խնածախ բնակավայրի ուղղությամբ, ինչի հետևանքով բնակելի տուն է վնասվել։
Նախարարությունը հերթական անգամ հիշեցրել է, որ վարչապետի աշխատակազմն առաջարկել է հրադադարի ռեժիմի խախտման դեպքերի և/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծել, ինչին մինչև օրս Ադրբեջանը չի արձագանքել։
Հայաստանի պաշտպանության նախարարությունը նաև վերահաստատել է, որ ՀՀ վարչապետի աշխատակազմի դիրքորոշմանը համապատասխան պատրաստ է հետաքննել Ադրբեջանի ՊՆ հաղորդագրությունը հիմնավորող փաստերը՝ դրանք ՀՀ-ին փոխանցելու պարագայում։
