Հայաստանի պաշտպանության նախարարությունը հերքում է ադրբեջանական կողմի հաղորդագրությունը, թե իբր մարտի 29-ի երեկոյան և մարտի 30-ի առավոտյան ՀՀ ԶՈՒ ստորաբաժանումները կրակ են բացել սահմանագոտու արևելյան և հարավարևելյան հատվածներում տեղակայված ադրբեջանական դիրքերի ուղղությամբ:
Պաշտպանական գերատեսչությունը հիշեցնում է՝ վարչապետի աշխատակազմն առաջարկել է հրադադարի ռեժիմի խախտման դեպքերի և/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծել, ինչին մինչև օրս Ադրբեջանը չի արձագանքել։
Հայաստանի պաշտպանության նախարարությունը նաև վերահաստատում է, որ ՀՀ վարչապետի աշխատակազմի դիրքորոշմանը համապատասխան՝ պատրաստ է հետաքննել Ադրբեջանի ՊՆ հաղորդագրությունը հիմնավորող փաստերը՝ դրանք ՀՀ-ին փոխանցելու պարագայում։
Հայկական կողմը նաև նախորդ շաբաթ էր հերքել կրակոցների մասին Բաքվի բոլոր պնդումները:
Սյունիքի սահմանամերձ Խոզնավարի ու Խնածախի բնակիչներն «Ազատության» հետ զրույցում օրեր առաջ հաստատել են, որ ավելի քան մեկ շաբաթ ադրբեջանական կողմն ինքն է կրակոցներ արձակել:
