Փարաքար համայնքի 14/14 ընտրատեղամասում ժամը 14:00-ի դրությամբ 1574 ընտրողից քվեարկել են 482-ը, «Ազատությանը» հայտնեց հանձնաժողովի նախագահ Լիլիթ Ավետիսյանը։
Նա նաև շեշտեց՝ ընտրատեղամասում մինչ այժմ որևէ խախտման մասին արձանագրություն չի կազմվել, ամեն ինչ հանգիստ է։
Քիչ առաջ «Ազատության» տեսախցիկը ֆիքսել է՝ ինչպես են տարբեր քվեատուփերի մոտ քվեարկող երկու քաղաքացիներից մեկը մյուսին հարցնում՝ առաջին համարի օգտին քվեարկի՞, ուղղորդումն ստանալուց հետո միայն քաղաքացին կատարում է ընտրությունը։
Առաջին համարը «Քաղաքացիական պայմանագրի» թեկնածու Լյուդվիգ Գյուլնազարյանն է։
Փարաքարի ՏԻՄ ընտրություններին մասնակցում է 4 քաղաքական ուժ: Նրանք են՝ «Քաղաքացիական պայմանագիր»-ը, «Միասնություն» դաշինքը, «Ազգային առաջընթաց»-ը և «Կայունություն»-ը:
Փարաքարում ընտրական իրավունք ունի 20 հազար 967 անձ: Ժամը 11-ի դրությամբ, ըստ ԿԸՀ-ի, ընտրությանը մասնակցել է 14.76 տոկոսը:
