Փարաքար համայնքում ընդդիմադիր «Ապրելու երկիր» կուսակցության ներկայացուցիչ Վալոդյա Գրիգորյանը հաղթեց «Քաղաքացիական պայմանագրի» թեկնածու Լյուդվիգ Գյուլնազարյանին: Կենտրոնական ընտրական հանձնաժողովի նախնական տվյալներով՝ Գրիգորյանի առաջնորդած «Միասնություն» դաշինքը երեկ անցկացված ընտրություններում ստացել է ձայների մոտ 57 տոկոսը:
«Ժողովուրդը տվեց իր վստահությունը, և դա ինձ շատ պարտավորեցնող է, որպեսզի ես նույնպես գրանցեմ այնպիսի առաջընթաց, որը որ սպասում է մեր Փարաքար խոշորացված համայնքի ժողովուրդը», - «Ազատության» հետ զրույցում հայտարարեց Գրիգորյանը:
Ընդդիմադիր թեկնածուի համար հաղթանակը սպասելի էր, ասում է՝ քարոզարշավի ընթացքում մարդկանց տրամադրվածությունից արդեն պարզ էր՝ վստահում են իրենց ուժին:
«Քաղաքացիական պայմանագրի» պարտված թեկնածու Լյուդվիգ Գյուլնազարյանը շնորհավորել է մրցակցին հաղթանակի կապակցությամբ: Գյուլնազարյանը, որ պնդում էր, թե հենց «Քաղաքացիական պայմանագիրն» է մեծամասնություն ստանալու, այսօր սոցիլական ցանցի իր էջում գրել է. - «Փարաքարը մեր տունն է, ու բոլորիս անելիքն է առավելագույնը անել Փարաքար համայնքի զարգացման համար։ Շնորհավորում եմ համայնքի ղեկավարի ընտրություններում հաղթած թեկնածու Վալոդյա Գրիգորյանին»։
Նախնական տվյալներով՝ Փարաքարում ընտրելու իրավունք ունեցող 21 004 քաղաքացուց երեկ քվեարկությանը մասնակցել է 11 528: ՔՊ-ի օգտին քվեարկել է 3 669-ը: Լյուդվիգ Գյուլնազարյանը համայնքի բնակիչներին շնորհակալություն է հայտնել, որ 2021-ի համեմատ ավելի շատ քվե են ստացել: Այն ժամանակ Փարաքարում ՔՊ-ն 2 609 ձայն էր ստացել: Այս ընտրություններին նախորդի համեմատ նաև ընդդիմադիր Վալոդյա Գրիգորյանի թիմի օգտին են ավելի շատ կողմ քվեարկողները. եթե 2021-ին Գրիգորյանը և նրա ներկայացրած «Ապրելու երկիր» կուսակցությունը ստացել էին 4 637, ապա այս անգամ 6 508՝ մոտ 2 հազարով ավելի:
«Մենք կառավարելու ենք համայնքը ի շահ ժողովրդի՝ Փարաքար խոշորացված համայնքի բնակչի», - վտահեցրեց Գրիգորյանը:
2021-ի Փարաքարի ընտրություններին էլ ամենաշատ ձայները հենց «Ապրելու երկիրն» էր ստացել՝ 49 տոկոս , բայց «Քաղաքացիական պայմանագիրը» միացավ «Դավիթ Մինասյան» դաշինքին՝ ստանձնալով համայնքի կառավարումը, սկզբից Մինասյանը, ապա Գյուլնազարյանը կառավարեցին Փարաքարը: Պաշտոնը ստանձնելուց չորս ամիս անց Լյուդվիգ Գյուլնազարյանը հրաժարական տվեց արյունալի մի միջադեպի ներկա գտնվելու պատճառով, նշանակվեցին արտահերթ ընտրություններ:
«Ապրելու երկիր» կուսակցության համահիմնադիր Մեսրոպ Առաքելյանն ասում է՝ երեկվա ընտրությունը փարաքարցիների պատասխանն էր «Քաղաքացիական պայմանագիր» կուսակցությանը, որ 2021-ին չթողեց մեծամասնություն ստացած ուժը Փարաքարում ստանձի համայնքի կառավարումը:
«Նախորդ ընտրւթյուններում 49 տոկոս ձայն էինք հավաքել, ու հետագայում նաև այլ խնդիրներ եղան, նաև դատական գործընթացներով վիճարկեցին, այսինքն՝ ակհայտ էր, որ ՔՊ-ի կողմից տեղի է ունեցել անարդարություն և իշխանազավթում, որը քաղաքացիների կողմից տվյալ արձագանքը ստացավ», - «Ազատության» հետ զրույցում հայտարարեց Առաքելյանը:
Ո՛չ «Քաղաքացիական պայմանագիր» կուսակցությունը, ո՛չ նրանց թեկնածու Լյուդվիգ Գյուլնազարյանը չեն պատասխանում զանգերին: Համայքի ղեկավարի հաղթած թեկնածու Վալոդյա Գրիգորյանը չի կարծում, թե համայնքի կառավարման հարցում խնդիրներ կլինեն գործադիր իշխանության հետ:
«Էստեղ կա ժողովրդի հարց, որը, ինձ թվում է, թե՛ համայնքային իշխանության, թե՛ Կառավարության տրամադրվածությունը պետք է լինի դրական, որովհետև էստեղ ժոովուրդն է էդ քվեն տվել: Եթե Կառավարությունը պետք է նայի, որ ընդդիմություն է ղեկավարում համայնքում ու ինչ-որ պրոբլեմներ ստեղծի համայնքի համար, ժողովրդի համար, ինձ թվում է՝ դա նորմալ չի տենց: Ինձ թվում է՝ ամեն ինչ նորմալ լինելու», - «Ազատությանը» ասաց Գրիգորյանը:
Մեկ շաբաթ անց , երբ Կենտրոնական ընտրական հանձնաժողովն արդյունքների վերաբերյալ վերջնական արձանագրություն կազմի, ավագանու անդամները կտանան մանդատները: Նախնական տվյալներով՝ 12 մանդատ կստանա հաղթող «Միասնություն» դաշինքը, 7-ը՝ ՔՊ-ն, և 2 մանդատ էլ կտրվի «Ազգային առաջընթաց» կուսակցությանը: Վալոդյա Գրիգորյանը օրենքի ուժով կդառնա համայնքի ղեկավար:
