Հայաստանի երրորդ նախագահ Սերժ Սարգսյանի ղեկավարած «Հանրապետական» կուսակցությունը Գյումրիի քաղաքապետի ընտրության հարցում Մարտուն Գրիգորյանի որոշումների վրա ազդեցություն գործելը և նրան ուղղորդելը կոռեկտ չի համարում:
«Հանրապետական» պատգամավոր («Պատիվ ունեմ») Տիգրան Աբրահամյանն «Ազատության» հետ զրույցում պարզաբանում է՝ թեև Մարտուն Գրիգորյանն իրենց խմբակցության պատգամավորն է, սակայն անկուսակցական է, և Գյումրիի ընտրություններում էլ Սերժ Սարգսյանի ղեկավարած ուժը նրան ոչ առաջադրել է, ոչ էլ սատարել: Այսինքն՝ նախնական փուլից մինչև այսօր ՀՀԿ-ն չի ազդել Գրիգորյանի որոշումների վրա, և հիմա էլ, ըստ Աբրահամյանի, Վարդան Ղուկասյանին սատարել-չսատարելու Մարտուն Գրիգորյանի որոշումը կախված չէ «Հանրապետականի» դիրքորոշումից:
Ամեն դեպքում ՀՀԿ-ն իր տեսակետը փոխանցել է գործընկերոջը: Կուսակցությունը թեև չի հրապարակայնացում այն, սակայն, ինչպես Աբրահամյանն է նշում, իրենք համոզված են, որ չպետք է թույլ տալ Նիկոլ Փաշինյանի իշխանության վերարատադրությունը Գյումրիում:
«Զուտ մարդկային առումով նաև հասկանում ենք այն մտորումներն ու մտահոգությունները, որ ունի Մարտուն Գրիգորյանը Գյումրիում ստեղծված աուրայի, մենթալիտետի և Վարդան Ղուկասյանի հետ ունեցած այդ տասնամյակների խնդիրների համատեքստում, բայց, բնականաբար, որպես քաղաքական ուժ՝ մենք այս թեմային նայում ենք բացառապես քաղաքական տեսանկյունից: Բնականաբար, լուծումների կամ հանգուցալուծումների համատեքստում առաջին հերթին դրված են քաղաքական որոշումները, որոնք պետք է բխեն այս իշխանությանը որևէ ձևով թույլ չտալու վերարտադրվելու կամ հավելյալ իշխանություն ստանալու տրամաբանությունից», - ասաց նա:
Հարցին, թե այսինքն՝ իր դիրքորոշումն այն է, որ ամեն դեպքում չպետք է թույլ տալ, որ Գյումրիում քաղաքապետ դառնա ՔՊ-ի թեկնածուն, Տիգրան Աբրահամյանը պատասխանեց. «Դա հստակ է, դա միանշանակ է, ընդ որում նաև Մարտուն Գրիգորյանն է հստակ խոսում, որ որևէ պայմաններում չի կարող լինել իր կողմից այնպիսի քայլ, որը կարող է բերել ՔՊ-ական իշխանության ձևավորմանը»:
Այն, որ «Մեր քաղաքը» դաշինքի առաջնորդ Մարտուն Գրիգորյանը, մի կողմ դնելով Վարդան Ղուկասյանի հետ տասնամյակների հակամարտությունը, պետք է, այնուամենայնիվ, սատարի նախկին քաղաքապետին, ֆեյսբուքյան իր էջում գրել է նաև ՀՀԿ փոխնախագահ Արմեն Աշոտյանը՝ հորդորելով Փաշինյանի և Վարդան Ղուկասյանի միջև ընտրություն կատարելիս նախապատվությունը տալ, ինչպես ինքն է ձևակերպել, «չարյաց փոքրագույնին»:
«Մարտո՛ւն ջան, անգլիացիներն ասում են, որ երկու չարիքներից և ոչ մեկին չեն ընտրում։ Մենք Անգլիա չենք, և Նիկոլի իշխանության համեմատ մնացած բոլոր խնդիրները խամրում են, ուստի չարյաց փոքրագույն նախընտրելը, իմ կարծիքով, այլընտրանք չունի», - գրել է նա։
«Արմեն Աշոտյանը կուսակցությունում ունի առաջին փոխնախագահի կարգավիճակ, և նրա քաղաքական մտքերը, բնականաբար, ոչ պատահական չեն, ոչ էլ կարող են ունենալ մասնավոր բնույթ։ Այնպես որ, Արմենի խոսքին պետք է մոտենալ որպես կուսակցության ղեկավար կազմ ներկայացնող անձի դիրքորոշման», - նշեց Աբրահամյանը:
Ի դեպ, «Պատիվ ունեմ» խմբակցության քարտուղարը նշում է, թե Մարտուն Գրիգորյանի միջոցով փորձ է արվում թիրախավորել ՀՀԿ-ն, ընդ որում ըստ պատգամավորի՝ դա արվում է նաև ընդդիմադիր շրջանակներից կողմից: Հանրապետական պատգամավորը չի բացառում, որ որոշ շրջանակներ ցանկանում են, որ ի վերջո Գրիգորյանը չսատարի և չընտրի Վարդան Ղուկասյանին քաղաքապետ, Սերժ Սարգսյանի ղեկավարած ուժին հարվածելու համար:
Գյումրիի ավագանիում 6 տեղ ստացած «Մեր քաղաքը» դաշինքի առաջնորդ Մարտուն Գրիգորյանը 4-րդ օրն է՝ պահում է ինտրիգը և չի ասում՝ ի վերջո սատարելո՞ւ է 8 տեղ ունեցող Վարդան Ղուկասյանին: Առանց Մարտուն Գրիգորյանի ղեկավարած դաշինքի ձայների Կոմկուսի ցուցակը գլխավորող Վարդան Ղուկասյանը քաղաքապետարան վերադառնալ չի կարող. իր և իրեն աջակցող մյուս երկու ընդդիմադիր ուժերի ձայները միասին բավարար չեն:
«Քաղաքացիական պայմանագիրը» Սարիկ Մինասյանի գլխավորությամբ ստացել է 14 տեղ, այսինքն՝ Գյումրիի քաղաքապետ ընտրվելու համար նրան պակասում է ընդամենը 3 ձայն: Ավագանին քաղաքապետին ընտրում է գաղտնի քվեարկությամբ, և առայժմ պարզ չէ, թե իրադարձություններն ինչպես կզարգանան:
