Գյումրիի դեպքերի գործով մեղադրյալներից երկուսն ազատ կարձակվեն կալանքից՝ «Մեր ձևով» շարժման Գյումրիի համակարգող, փաստաբան Ռուբեն Մխիթարյանն ու քաղաքապետ Վարդան Ղուկասյանի եղբոր թոռը՝ Նարեկ Ղուկասյանը:
Երկուսի փաստաբաններն էլ տեղեկացրել են, որ խափանման միջոցը փոխելու բողոքը վերաքննիչ դատարանն ամբողջությամբ բավարարել է, և որոշում է կայացվել կիրառված կալանք խափանման միջոցը վերացնել ու անհապաղ ազատ արձակել:
Փաստաբանները պնդում են, որ առաջադրված մեղադրանքի հիմքում մեկ ոստիկանի ցուցմունք է եղել:
Գյումրիի գործով 43 մեղադրյալ կա, կալանքի տակ կմնան նրանցից 24-ը:
Քրեական վարույթը նախաձեռնվել էր, երբ Գյումրիի քաղաքապետ Վարդան Ղուկասյանին էին ձերբակալում հոկտեմբերի 20-ին: Նրա աջակիցները հավաքվել էին քաղաքապետարանի մոտ: Երբ Ղուկասյանին ձերբակալեցին ու տեղափոխեցին Երևան, Գյումրի բերված մեծ թվով ոստիկանների ու Ղուկասյանի աջակիցների միջև բախում եղավ, որի հետևանքով էլ եղան բերման ենթարկվածներ:
Նրանք մեղադրվում են գործի քննությանը միջամտելու և զանգվածային անկարգությունների մասնակցելու կամ դրդելու համար:
