Այսօր Կապիտոլիումի շենքում տեղի ունեցավ ԱՄՆ ընտրյալ նախագահ Դոնալդ Թրամփի երդմնակալության արարողությունը։
«Ես հանդիսավորությամբ երդվում եմ, որ հավատարմորեն իրականացնելու եմ Նախագահի պարտականությունները և իմ ամբողջ կարողություններով լավագույնս պահպանելու եմ, նեցուկ եմ կանգնելու և պաշտպանելու եմ Ամերիկայի Միացյալ Նահանգների Սահմանադրությունը», - հայտարարեց Թրամփը:
Քիչ անց նա նաև ելույթով հանդես եկավ` մասնավորապես վստահեցնելով, որ «Ամերիկայի ոսկե դարաշրջանը սկսվում է հենց այժմ», «այսօրվանից մեր երկիրը ծաղկելու է ու վերստին հարգանք է վայելելու ամբողջ աշխարհում», և խոստանալով «Ամերիկան դնել առաջին տեղում»;
ԱՄՆ 45-րդ նախագահը երկրորդ անգամ է ստանձնում երկրի ղեկավարի պաշտոնը՝ դառնալով Միացյալ Նահանգների նաև 47-րդ նախագահը։
Թրամփից առաջ հանդիսավոր երդում տվեց նորընտիր փոխնախագահ Ջեյ Դի Վենսը:
