Ադրբեջանական դատարանը հրաժարվել է բավարարել Արցախի նախկին ռազմաքաղաքական ղեկավարների տնային կալանքի ենթարկելու միջնորդությունը, փոխանցում են ադրբեջանական լրատվամիջոցները:
Նախորդ նիստին, ըստ հաղորդումների, Արցախի նախկին պաշտոնյաների փաստաբանները միջնորդել էին խափանման միջոցը տնային կալանքով փոխել:
Բաքվի դատարանը մերժել է նաև նախկին պետնախարար Ռուբեն Վարդանյանի միջնորդությունը. նա 10 օր էր խնդրել գործի նյութերին ծանոթանալու համար։
Ալիևի ռեժիմը նրանց տասնյակ ծանր մեղադրանքներ է ներկայացրել:
Արցախի նախկին պաշտոնյաների գործով դատական նիստը մեկնարկել է հունվարի 17-ին: Ռուբեն Վարդանյանի գործն առանձնացրել են:
Ըստ ադրբեջանական ԱՊԱ-ի՝ հաջորդ դատական նիստը նշանակված է փետրվարի 6-ին:
Ադրբեջանական բանտերում դեռ 23 հայ է պահվում, այդ թվում՝ Ադրբեջանի կողմից Արցախի վրա 2023-ին սեպտեմբերի 19-ի ռազմական հարձակման հետևանքով գերեվարված 16 անձինք։ Գերեվարվածների շարքում են արցախցի 8 պաշտոնյաները՝ նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, Ազգային ժողովի նախագահ Դավիթ Իշխանյանը, նախկին պետնախարար Ռուբեն Վարդանյանը, Պաշտպանության բանակի նախկին հրամանատար Լևոն Մնացականյանը, ՊԲ հրամանատարի նախկին տեղակալ Դավիթ Մանուկյանը և նախկին արտգործնախարար Դավիթ Բաբայանը:
