Բաքվի ռազմական դատարանում երեկ հարցաքննվել է Արցախի ռազմաքաղաքաղական ղեկավարության մեկ այլ ներկայացուցիչ՝ այս անգամ գեներալ- մայոր Դավիթ Մանուկյանը:
Արցախի Պաշտպանության բանակի հրամանատարի նախկին տեղակալ Դավիթ Մանուկյանը 2023-ի ադրբեջանական ռազմական ագրեսիայից հետո՝ սեպտեմբերի 27-ին էր առևանգվել ադրբեջանցիների կողմից:
Միջազգային կառույցների և անկախ լրատվամիջոցների բացակայությամբ ընթացող դատավարության մասին տեղեկություններ է փոխանցել պետական «Ազերթաջ» գործակալությունը՝ նշելով, թե Մանուկյանն ասել է, որ «Ղարաբաղյան առաջին պատերազմի ժամանակ Ադրբեջանի դեմ ռազմական գործողություններին մասնակցել է «Դաշնակցության» գումարտակի կազմում», կռվել է Աղդամում և Քելբաջարում: Հետագայում արդեն, ըստ լրատվամիջոցի հաղորդման, ասել է, որ եղել է դասակի ու դիվիզայի հրամանատար, ապա ղեկավարել է Շուշիի գումարտակը: Մարտակերտում զինվորական զորամաս ղեկավարելիս նախագահ Ռոբերտ Քոչարյանն իրեն պարգևատրել է Մարտական խաչ 2 -րդ աստիճանի մեդալով:
Ապա, ինչպես «Ազերթաջն» է փոխանցում, Դավիթ Մանուկյանն ասել է, որ Արմեն Սարգսյանի հրամանագրով նշանակվել է Արցախի Պաշտպանության բանակի հրամանատարի առաջին տեղակալ: Բարձրաստիճան զինվորականը նշել է, որ այդ պաշտոնը զբաղեցրել է նաև 2020 -ի 44-օրյա պատերազմի ընթացքում և հրահանգներ է ստացել պաշտապանության նախարար Ջալալ Հարությունյանից:
Արդեն 44-օրյա պատերազմի հետո Արցախի Պաշտպանության բանակում կրճատումներ են տեղի ունեցել, Մանուկյանը չի մանրամասնել, թե ինչու: Ամեն դեպքում նշել է, որ 2021 թվականին իրեն բանակից ազատել են՝ Հայաստանի նախագահի հրամանագրով:
Ադրբեջանցի մեղադրող դատախազը երեկվա դատական նիստին հետաքրքրվել է, թե ինչպես և որտեղից էին Արցախի պաշտպանական բանակում նշանակումներ կատարվում, ինչպե՞ս և որտեղի՞ց են աշխատավարձեր տրվել, զինվորական կոչումներ շնորհվել, զենքերը որտեղից են ստացել և այլն: Ըստ «Ազերթաջի»՝ Դավիթ Մանուկյանն ասել է, թե «Արցախի նախագահը Ղարաբաղի պաշտպանության նախարար նշանակելու իրավունք չուներ, Հայաստանի նախագահն էր այդ նշանակումներն անում կամ կախված կառավարման համակարգից՝ պաշտոնատար այլ անձ: Իսկ զենք-զինամթերքը ստացել են Հայաստանից»:
Ինչ վերաբերում է 44-օրյա պատերազմի ժամանակ սահմանից հեռու գտնվող ադրբեջանական տարածքների հրթիռակոծությանն, ապա Արցախի Պաշտպանական բանակի հրամանատարի տեղակալն ասել է, որ տեղյակ չի եղել այդ մասին, այդ իրադարձություններին ծանոթացել է ավելի ուշ:
Ադրբեջանցի դատախազը գեներալ -մայորից նաև հետաքրքրվել է Արցախի նախկին պետնախարար, այժմ Բաքվի բանտում գտնվող Ռուբեն Վարդանյանի հետ ունեցած հարաբերությունների մասին: Մանուկյանը պատմել է, թե ինչպես է Ռուբեն Վարդանյանը 2023-ի սեպտեմբերի 27-ին հայտնվել իր մեքենայում, ապա ձերբակալվել իր հետ միասին Հակարիի կամրջի վրա:
Բարձրաստիճան զինվորականն, ըստ ադրբեջանական լրատվամիջոցի, ասել է, թե Արցախի հայաթափման օրերին, երբ բոլորը լքում էին իրենց տները, մեկնելուց առաջ Ռուբեն Վարդանյանին հարցրել է, թե նա ինչպե՞ս է մեկնելու: Վարդանյանը ուսերն է թոթվել, ապա հարցրել է՝ արդյոք Մանուկյանի մեքենայում տեղ կա՞: Նա ասել է, որ հարևանն է ուզում իր հետ գալ, բայց հետո կինը զանգահարել ու տեղեկացել է, որ հարևանի տղան արդեն մեքենա է գտել, որից հետո առաջարկել է Ռուբեն Վարդանյանին իր մեքենան նստել: Ավելի ուշ արդեն իրենց կանգնեցրել են Լաչինի անցակետում:
Ի դեպ, նախկին պետնախարար Ռուբեն Վարդանյանը, ում գործը Ադրբեջանը առանձնացրել է Արցախի մյուս ղեկավարների գործից, և մեղադրում է մի քանի տասնյակ ծանր հանցանքների մեջ, անցած ամիս Բաքվի բանտից ուղարկած իր հեռախոսային ձայնագրության մեջ հատուկ անդրադարձել էր այս դրվագին՝ հաստատելով ավելի վաղ մամուլում շրջանառվող այն լուրերը, որ եթե Վարդանյանն այդ պահին չլիներ Դավիթ Մանուկյանի մեքենայում, ապա նա այժմ կլիներ կնոջ՝ Ալվարդի կողքին և ոչ թե Բաքվի բանտում: Վարդանյանը նշել էր, որ իրեն մեծ ցավ է պատճառում այդ հանգամանքը, ինչի համար ներողություն էր խնդրել. «Ալվա՛րդ, եթե ես չլինեի Ձեր մեքենայում, Ձեր ամուսնու կողքին և Ձեզ հետ, նա հիմա Ձեզ հետ կլիներ: Ներեցեք ինձ, սա ինձ համար ամենածանր պատիժն է, որ իմ պատճառով ևս մեկ մարդ տառապում է այստեղ Ձեզ հետ միասին»:
Արցախի ռազմաքաղաքական ղեկավարության դատավարությունը Բաքվի զինվորական դատարանում շարունակվելու է ապրիլի 7-ին: Արդեն իսկ հարցաքննվել են նախագահներ Արայիկ Հարությունյանն ու Բակո Սահակյանը, Պաշտպանության բանակի նախկին հրամանատար Լևոն Մնացականյանը, Ազգային ժողովի նախագահ, դաշնակցական Դավիթ Իշխանյանը:
