«Բաքվի բանտում պահվող հայ քրիստոնյա ռազմագերիների ազատ արձակումն առաջնահերթություն է ԱՄՆ նոր վարչակազմի համար», - Catholic News Agency-ին տված հարցազրույցում պնդել է ամերիկացի հայտնի իրավապաշտպան, Արցախի նախկին պետնախարար Ռուբեն Վարդանյանի փաստաբան Ջարեդ Գենսերը:
«Մեզ ասվել է, որ բանտարկյալների ազատ արձակումը պետք է նախապայման լինի, որպեսզի նախագահ Թրամփն անվերապահորեն աջակցի խաղաղության գործընթացին», - նշել է նա:
Թե ԱՄՆ նոր վարչակազմից կոնկրետ ով է նման հավաստիացումներ տվել, Գենսերը չի մանրամասնել: Ամեն դեպքում հրապարակային նման կոչ նախագահ Թրամփի վարչակազմից առայժմ չի հնչել: Սակայն շաբաթներ առաջ ԱՄՆ նախագահի ազգային անվտանգության գծով խորհրդական Մայք Ուոլցը իր ադրբեջանցի պաշտոնակցի՝ Հիքմեթ Հաջիևի հետ զրույցում ասել էր՝ պետք է ավարտին հասցնել խաղաղության գործընթացը և ազատ արձակել բանտարկյալներին:
Ի դեպ, ամերիկացի հայտնի իրավապաշտպան Ջարեդ Գենսերը խիստ կարևորում է, որպեսզի Բաքվի բանտերում պահվող հայ ռազմագերի ազատ արձակման հարցը նախապայման դառնա խաղաղության պայմանագրի ստորագրման համար: Գենսերը նշել է, որ այս առանցքային հարցերի լուծումը ներառված չէ խաղաղության պայմանագրում և ոչ էլ երկկողմ օրակարգի մաս են:
«Մեր ամենամեծ անհանգստությունն այն է, որ եթե խաղաղության գործընթացն առաջ ընթանա, բայց չլուծվի Լեռնային Ղարաբաղի կամ հայ քրիստոնյա ռազմագերիների հարցը, ապա ցավոք, այն կարող է հանգեցնել ռազմագերիների զոհաբերությանը իբրև այդ խաղաղության պայմանագրի մաս», - նշել է Գենսերը:
Իրավապաշտպանը նաև ընդգծել է, որ Հայ Առաքելական եկեղեցու հետևորդ Ռուբեն Վարդանյանին Բաքվի բանտում արգելել են Աստվածաշունչ ունենալ, ինչն, ըստ փաստաբանի, ամրապնդում է այն համոզմունքը, որ նա և Լեռնային Ղարաբաղի մյուս ղեկավարները հետապնդվում են ոչ թե, որ նրանք ենթադրյալ անջատողականներ են, այլ որ քրիստոնյաներ են:
Դավիթ Իշխանյանը չի թաքցրել՝ ադրբեջանական զինուժի դեմ մղած մարտերում պարգևատրվել է «Մարտական խաչ» շքանշանով
Ի դեպ, նախօրեին, Բաքվի ռազմական դատարանում հարցաքննվել է Արցախի Ազգային ժողովի նախագահ, դաշնակցական Դավիթ Իշխանյանը: Միջազգային կառույցների և անկախ լրատվամիջոցների բացակայության պայմաններում ընթացող դատավարության ընթացքում, ըստ պետական «Ազերթաջ» գործակալության, Արցախի խորհրդարանի նախկին ղեկավարը, պատասխանելով դատախազի հարցին, թե որն է եղել Ղարաբաղյան առաջին պատերազմի նպատակը, ասել է, որ այն ժամանակ շատ երիտասարդ է եղել, բայց հետո հասկացել է, որ նպատակը Արցախի և Հայաստանի միավորումն է:
Իշխանյանն, ըստ Բաքվի պետական լրատվամիջոցի, նաև պատմել է, որ ծնվել է ԽՍՀՄ Ադրբեջանում, Սովետական Միության փլուզումից հետո, ինքը, ինչպես նաև 150 հազար արցախցիներ դարձել են Հայաստանի քաղաքացիներ: Առաջին Ղարաբաղյան պատերազմի ժամանակ, մասնակցել է ռազմական գործողություններին Աղդամում, Քելբաջարում, Հադրութում, Մարտակերտում: Ղեկավարել է Հադրութի 8 գումարտակներից մեկը և ենթարկվել է Մոնթե Մելքոնյանին, իսկ բանակը ղեկավարել են Սամվել Բաբայանն ու Սերժ Սարգսյանը: Իշխանյանը չի թաքցրել՝ ադրբեջանական զինուժի դեմ մղած մարտերում պարգևատրվել է «Մարտական խաչ» շքանշանով:
Դավիթ Իշխանյանը, ինչպես նաև Արցախի մյուս ռազմաքաղաքական ղեկավարությունը Բաքվի բռնապետական ռեժիմի կողմից մեղադրվում են Ադրբեջանի դեմ պատերազմ մղելու, ցեղասպանության, ահաբեկչության, իշխանությունը բռնազավթելու և այլ ծանր հանցանքերի մեջ: Հայերի դատավարությունը նաև այսօր է շարունակվել:
