Արցախի նախագահ Արայիկ Հարությունյանն այսօր խորհրդակցություն է հրավիրել՝ ուժային կառույցների ղեկավարների մասնակցությամբ։
Ըստ Արցախի նախագահի գրասենյակի՝ քննարկվել է Ադրբեջանի կողմից Լաչինի միջանցքի շրջափակման հետևանքով Արցախում ստեղծված իրավիճակում ներքին և արտաքին անվտանգությանը վերաբերող հարցերի լայն շրջանակ։ Հարությունյանը ներկաներին մի շարք հանձնարարականներ է տվել։
Խորհրդակցությանը մասնակցել է նաև Արցախի անվտանգության խորհրդի քարտուղար Վիտալի Բալասանյանը:
Արդեն 17 օր է Ադրբեջանը փակ է պահում Արցախը Հայաստանին կապող միակ ճանապարհը։ 1100 քաղաքացի, որից 270-ը՝ անչափահաս, տուն վերադառնալու հնարավորություն չունի: Շուշիի հատվածում միջանցքը փակած ադրբեջանցիներն իրենց անվանում են անկախ բնապահպաններ, ճանապարհի հենց մեջտեղում վրաններ են տեղադրել։ Միջանցքը փակ է նաև շտապօգնության մեքենաների համար։
Արցախից ահազանգում են՝ սննդի, դեղորայքի դեֆիցիտ կա, խնդիրներ են սկսել առաջանալ նաև տնտեսական ոլորտում։
