Ընդհանուր անվտանգության և պաշտպանական քաղաքականության և ճգնաժամերի արձագանքման գծով Եվրոպական արտաքին գործողության ծառայության գլխավոր քարտուղարի տեղակալ Չարլզ Ֆրայսն այսօր քաղաքական խորհրդակցությունների նպատակով ժամանել է Երևան:
Հայաստանում Եվրամիության պատվիրակության հաղորդագրության համաձայն, նախատեսված են հանդիպումներ ՀՀ կառավարության ղեկավարության հետ՝ քննարկելու երկկողմ հարաբերությունների օրակարգի հարցեր՝ այդ թվում՝ Համապարփակ և ընդլայնված գործընկերության համաձայնագրի իրականացումը։
Եվրոպացի պաշտոնյան նպատակ ունի հայ գործընկերների հետ քննարկել Եվրամիության դիտորդական առաքելության (EUMCAP) ներդրումը, ինչպես նաև հնարավոր հետագա քայլերը։
Կողմերը կանդրադառնան նաև Հայաստան-Ադրբեջան հարաբերությունների կարգավորմանն ուղղված ԵՄ ջանքերին, ասված է հաղորդագրությունում:
Եվրամիությունը Հայաստանում` Ադրբեջանի հետ սահմանին դիտորդական առաքելություն է տեղակայել ադրբեջանական զինված ուժերի սեպտեմբերյան հարձակումից մոտ մեկ ամիս անց՝ Պրահայում Հայաստանի, Ադրբեջանի, Ֆրանսիայի ու Եվրոպական խորհրդի ղեկավարների հանդիպման արդյունքում: 40 անզեն դիտորդներից կազմված առաքելության մանդատը Հայաստանի և Ադրբեջանի միջև սահմանային շրջաններում իրավիճակը դիտարկելն է՝ նպաստելու երկու երկրների միջև վստահության ամրապնդմանը և սահմանազատման հանձնաժողովների աշխատանքներին։
Առաքելությունը իր գործունեությունը պետք է ավարտի դեկտեմբերի 19-ին: Թեև ժամկետը չի երկարաձգվել՝ Բրյուսելը որոշել է Հայաստան ուղարկել խումբ, որպեսզի ծրագրի հնարավոր քաղաքացիական առաքելության ուղարկումը, եթե հաջորդ տարի նման համաձայնություն ձեռք բերվի:
