Ռուսաստանը վաղն առավոտից ռազմական դրություն է մտցնում Ուկրաինայից բռնազավթած չորս շրջաններում՝ Դոնեցկում, Խերսոնում, Զապորոժիեում և Լուգանսկում: Նախագահ Վլադիմիր Պուտինն այդ մասին հայտարարեց այսօր՝ Անվտանգության խորհրդի նիստում:
«Ես հրաման եմ ստորագրել Ռուսաստանի Դաշնության այս չորս սուբյեկտներում ռազմական դրություն մտցնելու մասին: Այն անհապաղ կուղարկվի հաստատման Դաշնության խորհուրդ և Պետդումա», - ասաց Ռուսաստանի նախագահը:
Մինչ Պուտինը հարևան երկրի տարածքում ռազմական դրություն է մտցնում, ուկրաինական բանակը շարունակում է հակահարձակումը Խերսոնում՝ մոտենալով մարզկենտրոնին։ Ուկրաինայի նախագահի խորհրդական Միխայիլ Պոդոլյակը գրել է, թե Պուտինի որոշումը չի կարող իրենց կանգնեցնել։
Նույնն են պնդել նաև ուկրաինացի զինվորները՝ «Ազատության» «Նաստոյաշչեե Վրեմյա» ծրագրի հետ զրույցում: «Մետր առ մետր առաջ ենք գնում դեպի Խերսոն: Կուզենք արդեն այս երեկո, բայց դժվար: Եթե առաջ գնանք նույն տեմպերով, ինչ անցած շաբաթ էինք գնում, մինչև Նոր տարի կգրավենք Խերսոնը», - ասել է ուկրաինացի զինվորականը:
Ուկրաինայի Խերսոնի շրջանի Ռուսաստանի կողմից նշանակված իշխանությունները, իրենց հերթին, այսօր վաղ առավոտյան հորդորել են տեղի բնակիչներին անհապաղ հեռանալ տարածքից:
Ռուսական իշխանությունների հաղորդմամբ՝ Խերսոնի բնակիչներին Դնեպրի մյուս կողմը տարհանելու համար գործարկվել են լաստանավեր, որոնք մարդկանց տեղափոխում են Ալյոշկի և Գոլայա Պրիստան բնակավայրեր:
Շրջանի օկուպացիոն վարչակազմի ղեկավարի տեղակալ Կիրիլ Ստրեմոուսովը տեսաուղերձում պնդում է, որ Խերսոնի համար ճակատամարտը կսկսվի շատ մոտ ապագայում: «Չի բացառվում քաղաքի և շրջանի աջափնյա հատվածի գնդակոծումը», - ասել է Ստրեմոուսովը: Նրա խոսքով՝ Ուկրաինայի զինված ուժերը մեծ թվով ուժեր են դուրս բերել առաջնագիծ:
Խերսոնը ռուսների վերահսկողության տակ է անցել պատերազմի սկզբում: Աշնան սկզբից Ուկրաինայի զինված ուժերը սկսել են ակտիվ հակահարձակումը:
Ուկրաինայում ռուսական զորքերի հրամանատար գեներալ Սերգեյ Սուրովիկինը իրավիճակը Խերսոնի ուղղությամբ լարված է անվանել: Նա հայտարարել է, թե ուկրաինական բանակը շարունակում է փորձել ճեղքել ռուսական պաշտպանությունը: Գեներալի խոսքով՝ Խերսոնի հետ կապված հնարավոր է լինեն «դժվար որոշումներ»:
«Այս պայմաններում մեր առաջնահերթությունը խաղաղ քաղաքացիների կյանքի և առողջության պահպանումն է: Այսպիսով, ռուսական բանակը նախ և առաջ կապահովի բնակչության արդեն իսկ հայտարարված անվտանգ տեղափոխումը Ռուսաստանի Դաշնության կառավարության կողմից նախապատրաստվող վերաբնակեցման ծրագրով: Իսկ հենց Խերսոն քաղաքի հետ կապված ծրագրերը կախված կլինեն ռազմա-մարտավարական իրավիճակից: Ես նորից կասեմ՝ այսօրվա դրությամբ արդեն բարդ վիճակ է», - ասել է Սուրովիկինը:
Ընդ որում, ռուսական կողմն արդեն մի քանի օր է խոսում է Կախովկայի հիդրոէլեկտրակայանը ուկրաինացիների կողմից պայթեցնելու վտանգի մասին, իսկ այսօր, ինչպես ռուսական պետական լրատվամիջոցներն են հայտնել, սկսել են ՀԷԿ-ի ջրամբարից ջրի բացթողումը: Ռուսների կողմից նշանակված նահանգապետը հայտարարել է, թե Խերսոնը չի ընկնի ջրհեղեղի տակ, բայց մասնավոր հատվածի համար վտանգ կա:
Միաժամանակ, ռուսական բանակը շարունակում է հարվածներ հասցնել Ուկրաինայի քաղաքներին և էներգետիկ օբյեկտներին: Այս գիշեր, մասնավորապես, Զապորոժիեի շրջանի Էներգոդար քաղաքը կրկին գնդակոծվել է ռուսական բանակի կողմից: Քաղաքը մասամբ մնացել է առանց էլեկտրականության և ջրի:
Եվրահանձնաժողովի ղեկավար Ուրսուլա ֆոն դեր Լայենը հրթիռային հարվածները և անօդաչու թռչող սարքերի հարձակումները Ուկրաինայում էլեկտրակայանների և այլ ենթակառուցվածքների վրա ահաբեկչական գործողություններ և ռազմական հանցագործություններ է անվանել:
«Երեկ մենք կրկին ականատես եղանք քաղաքացիական ենթակառուցվածքների վրա ռուսական թիրախավորված հարձակումների: Սա արդեն իսկ շատ դաժան պատերազմի հերթական գլուխն է: Միջազգային կանոնները շատ պարզ են՝ դրանք ռազմական հանցագործություններ են», - հայտարարել է ֆոն դեր Լայենը:
ՆԱՏՕ-ի գլխավոր քարտուղարն էլ խոստացել է Ուկրաինային արդեն առաջիկա օրերին տրամադրել հատուկ հակաօդային սարքեր: Յենս Ստոլտենբերգն ավելի վաղ հայտարարել էր, որ Ուկրաինայի հակաօդային պաշտպանության ուժեղացումն առաջնահերթություն է դաշինքի համար:
Ուկրաինայի նախագահ Վլադիմիր Զելենսկին երեքշաբթի օրը հայտարարել էր, թե ռուսական զորքերը հոկտեմբերի 10-ից ի վեր ոչնչացրել են Ուկրաինայի էլեկտրակայանների 30 տոկոսը, ինչի պատճառով ամբողջ երկրում էլեկտրաէներգիայի զանգվածային անջատումներ են: Զելենսկին ուկրաինացիներին հորդորել է նվազեցնել էլեկտրաէներգիայի սպառումը՝ հատկապես պիկ ժամերին:
