Պրահայում վարչապետ Նիկոլ Փաշինյանը կրկին վերահաստատել է տարածաշրջանային բոլոր հաղորդակցությունների ապաշրջափակման վերաբերյալ Երևանի առաջարկը։ Այս մասին Փաշինյանը գրել է թվիթերյան իր էջում՝ ընդգծելով՝ Ադրբեջանը կրկին դրական պատասխան չի տվել։
«Ես կրկնում եմ՝ Հայաստանը պատրաստ է տարածաշրջանային հաղորդակցությունների ապաշրջափակմանը՝ հարգելով մեր ինքնիշխանությունը և օրենսդրությունը», - գրել է Փաշինյանը։
Հայաստանի վարչապետի այս գրառմանը Բաքուն դեռ չի արձագանքել։
Հինգշաբթի երեկոյան Փաշինյանն ու Ալիևը Պրահայում հանդիպել են Ֆրանսիայի նախագահ Էմանյուել Մակրոնի և Եվրոպական խորհրդի նախագահ Շառլ Միշելի մասնակցությամբ։
Ադրբեջանի առաջնորդը քառակողմ հանդիպման առաջին փուլից հետո հարցազրույց է տվել ադրբեջանական լրատվամիջոցներին ու պնդել, թե Հայաստանը չի ուզում ինքնակամ դեպի Նախիջևան ավտոճանապարհ տալ՝ այս անգամ չօգտագործելով «Զանգեզուրի միջանցք» արտահայտությունը:
