Արցախի Պաշտպանության բանակը հերքում է հայկական կողմից հրադադարի խախտման մասին Ադրբեջանի պաշտպանության նախարարության հերթական հաղորդումը։
«Մարտի 13-ին Ադրբեջանի պաշտպանության նախարարության տարածած հաղորդագրությունն այն մասին, թե Պաշտպանության բանակի ստորաբաժանումները մարտի 12֊ի լույս 13֊ի գիշերը գնդակոծության են ենթարկել Արցախի Հանրապետության Մարտունու և Մարտակերտի շրջանների ուղղությամբ տեղակայված ադրբեջանական դիրքերը, իրականությանը չի համապատասխանում: Այդ ապատեղեկատվությունը հրադադարի ռեժիմի սեփական խախտումները կոծկելու հերթական փորձն է», - ասված է Արցախի պաշտպանության նախարարության մամուլի ծառայության հաղորդագրությունում։
Առավոտյան Ադրբեջանի ռազմական գերատեսչությունը հաղորդել էր, թե շաբաթ երեկոյան ժամը 18։15-ից մինչև գիշերը ժամը 2։20 Արցախի ՊԲ զինծառայողները հրաձգային զենքից գնդակոծել են ադրբեջանական բանակի դիրքերը «Խոջավենդի և Թերթերի ուղղությամբ», ինչին ի պատասխան «ադեկվատ գործողություններ են ձեռնարկվել», այժմ այդ ուղղություններում իրավիճակը կայուն է։
