Ի՞նչ այլընտրանքային ճանապարհի մասին է խոսքը, ադրբեջանցիները պետք է հեռանան, «Ազատության» հետ զրույցում հայտարարեց Հայաստանի մարդու իրավունքների պաշտպան Արման Թաթոյանը:
Ստորև ներկայացնում ենք հատված հարցազրույցից:
Արման Թաթոյան. - Իմ կարծիքով՝ ադրբեջանական իշխանությունների նախապես պլանավորմամբ փակել են այդ ճանապարհը, նրանք շատ լավ իմացել են՝ ինչ իրավիճակում է հայտնվելու երկիրը, հատուկ են գնացել դրան: Կարծում եմ՝ նրանք շատ լավ տիրապետում են այդ ճանապարհների հատվածներին, այլընտրանքային ճանապարհների վիճակին և ինչի դա կարող է հանգեցնել, մարդկանց համար ինչ լրջագույն խնդիրներ կարող են առաջ գալ: Մենք տեսնում ենք, որ այստեղ իրավունքների զանգվածային խախտումներ են պարզապես, և այս արարքները հանցավոր են ուղղակի, այլ բառ հնարավոր չէ, սանձարձակ պահվածքով: Բացահայտ մտադրված էլ հենց փակել են այդ հատվածը:
Ընդամենը մոտ 10 օր առաջ ես Սյունիքում էի, հատուկ հրապարակել էի այդ հատվածը, մենք այդ հատվածով, որտեղ իրենք փակել են, դրանից մի քիչ վերև ևս մեկ հատված կա, այդ հատվածով իրենք դիրքավորված են, ամրացած, հիմնականում բոլոր տեղերը ադրբեջանական ուղեկալները տեսանելի են, մենք անգամ մեկ րոպե ժամանակով կանգնեցինք, մի տեղ մեզ վրա ինքնաձիգ պահեցին, այսինքն ուղղեցին հեռվից, նայում էինք, մեկը հեռադիտակով հետևում էր մեզ, մյուսը մտավ արագ իր տնակը:
«Ազատություն». - Դուք ուղղակի մայրուղում մեքենան կանգնեցրե՞լ եք:
Արման Թաթոյան. - Մենք մեկ րոպե կանգնեցրինք, ես հատուկ ուզում էի հասկանալ՝ ինչ կլինի, եթե օրինակ՝ մարդ վատանա, չգիտեմ, ուղևոր է երթևեկում, մեքենան անսարք դարձավ, օրինակ: Մեկ այլ տեղում սկսեցին արագ սուլոցներ արձակել, գոռգոռում էի, իբր ցույց էին տալիս, որ մի կանգնեք այստեղ: Ավելին՝ այդ հատվածներում, երբ Գորիսի հատվածից գալիս ենք դեպի Ծակքարի այդ հատվածով գնում ենք դեպի Որոտան, նաև մերոնք էլ խորհուրդ էին տալիս, ասում էին՝ արագ երթևեկել այդ հատվածով, որովհետև կմտածեն, որ սադրանքներ են:
Հիմա սրանց ներկայությունը՝ ադրբեջանական ուժերի ի սկզբանե ինքնին ներկայությունը արդեն մարդկանց կյանքի իրավունքի խախտում է, ազատ տեղաշարժման սահմանափակում: Մեր գյուղերը կտվել են հիմնական բնակավայրերից՝ Շուռնուխ, Որոտան, Բարձրավան, Նոր Առաջաձորի մի մասը, մի թաղամաս կա այնտեղ, մի քանի ընտանիներ նաև ապրում են, մարդիկ նույնպես կտրված են:
«Ազատություն». - Մարզկենտրոնի՞ց են կտրված:
Արման Թաթոյան. - Ոչ միայն մարզկենտրոնից են կտրված, օրինակ, հացը, ենթադրենք, ստանում են Գորիս ու Կապան քաղաքներից կամ բժշկական ծառայությունների հասանելիությունը, շտապօգնության անհրաժեշտություն եղավ և այլն:
«Ազատություն». - Այսինքն՝ լուրջ հումանիտար խնդիրներ կարող են առաջանալ:
Արման Թաթոյան. - Լուրջ հումանիտար խնդիր առաջացել է և կանգնել ենք այդ իրական վտանգի առաջ, այդ հումանիտար ճգնաժամի, մեր քաղաքացիական բնակչության համար:
«Ազատություն». - Պարոն Թաթոյան, Դուք ասում եք, որ նախապես ծրագրված, միտումնավոր է, Բաքուն հաղորդում է, որ այդ հատվածում միջադեպ է եղել, որ հայերը դանակահարել են ադրբեջանցիների, այսօր նաև Հայաստանի ազգային անվտանգության ծառայությանն է փոխանցվել ուղեկալի վրա հարձակման դեպքի մասին տեղեկություն, որը քննվելու է, նախնական տեղեկություններով Երևանը հերքում է: Դուք ինչո՞ւ եք համոզված, որ դա հորինված սադրանք է:
Արման Թաթոյան. - Մենք փաստահավաք աշխատանքները, ի սկզբանե կատարել ենք բոլոր ուսումնասիրությունները, կապի մեջ ենք եղել Ազգային անվտանգության ծառայության մեր գործընկերների հետ և այլն, մերոնք էլ ի սկզբանե ասում էին, որ նման բան բացառված է նման բան լիներ, իրենք իրենց մեջ երևի ինչ-որ բան է եղել: Անգամ եթե չլիներ, գիտեք, անգամ եթե լիներ, եկեք մի պահ պատկերացնենք՝ եղել է, ի՞նչ է դրա համար մի ամբողջ երկիր այսպես կաթվածահար են անո՞ւմ կամ ճանապարհները կաթվածահար են անո՞ւմ: Հետո ասում են՝ խաղաղություն և այլն:
«Ազատություն». - Պարոն Թաթոյան, այդ այլընտրանքային ճանապարհը, որ իշխանությունները պարբերաբար վկայակոչում են, որ մեծ թափով կառուցվում է, կարո՞ղ է հարցի լուծում լինել:
Արման Թաթոյան. - Ես այդ հարցը ճիշտ չեմ համարում դիտարկել, նրանք այդտեղից պետք է հեռանան: Ախր, ի՞նչ այլընտրանքային ճանապարհի մասին է խոսքը, հա, մենք պետք է ունենանք այլընտրանքային ճանապարհներ, դա մեր երկրի կենսագործունեության համար կարևոր է, բայց ոչ իրենց պատճառով: Ես կարծում եմ՝ մենք պետք է մինչև վերջ տանենք այն ճանապարհը և այն պնդումները, որ նրանք այդտեղից պետք է հեռանան, սա է խնդիրը, ինչի՞ ենք գնում այլընտրանքային ճանապարհ, այդպես լինի այլընտրանքային գյուղեր մեզ համար կառուցենք, այլընտրանքային քաղաքներ կառուցենք, այդպես ո՞նց կլինի: Ո՛չ դելիմիտացիա, ո՛չ դեմարկացիա է եղել, ո՞վ ասաց, որ դրանք իրենց տարածքներն են:
Հարցազրույցն ամբողջությամբ կարող եք դիտել այստեղ.
