Պաշտոնական Մոսկվան դեռ չի արձագանքել Ադրբեջանի կողմից Գորիս-Կապան մայրուղու փակմանը: Պաշտոնական Բաքուն նույնպես որևէ հայտարարություն այս մասին չի արել, իսկ ադրբեջանցի վերլուծաբանները նոր տերմին են օգտագործում` Հայաստանը Իրանի հետ կապող հիմնական ճանապարհը նրանք ներկայացնում են «ադրբեջանական փափուկ ուժ», որ կիրառում է Բաքուն Երևանին ճնշելու համար:
Ռուսական մամուլն ակտիվ լուսաբանում է իրավիճակը տարածաշրջանում: «Կոմերսանտը», մասնավորապես, «Ադրբեջանը պառկել է ճանապարհին. Բաքվում Հայաստանի վրա ճնշում գործադրելու նոր առիթ են գտել» վերնագրով հոդված է հրապարակել, որում հղում անելով ադրբեջանի վերլուծաբանին` գրում է, թե «ճանապարհը ապաշրջափակելու դիմաց Բաքուն Երևանից կպահանջի նաև ազատ թողնել ադրբեջանցի զինծառայող Ջամիլ Բաբաևին», ով նախօրեին Մարտակերտում մտել էր բնակելի տներից մեկը և ի վերջո հայտնվել Արցախի իրավապահների մոտ:
Բաքուն, ասում է ադրբեջանցի վերլուծաբանը, Երևանի վրա ճնշումներ գործադրելու էլի գործիքակազմ ունի, օրինակ` կարող է արգելափակել բջջային կապը Արցախի բնակչության համար: Ընդ որում, «Կոմերսանտը» շեշտում է, որ մինչև վերջին օրերը այդ ճանապարհի բնականոն աշխատանքն ապահովում էին ռուս խաղաղապահները:
Դեռևս անցած տարի` պատերազմի ավարտից հետո, Ռուսաստանի նախագահ Վլադիմիր Պուտինը եռակողմ համաձայնագրի հետ կապված իր բազմաթիվ ելույթներից մեկում հաղորդակցությունների վերականգնման մասին խոսելիս հիշատակել էր նաև Հայաստանի հյուսիսի և հարավի միջև բնականոն կապն ապահովելու անհրաժեշտությունը: Իսկ այն ժամանակ դեռ հրապարակավ չէին խոսում այն մասին, որ Հայաստանն Իրանի հետ կապող հիմնական մայրուղու որոշ հատվածներ անցնում են վիճելի տարածքներով:
«Վիճելի տարածքներ» տերմինն այս կապակցությամբ օգտագործում է միայն Երևանը, ռուսական մամուլն, օրինակ, օգտագործում է խորհրդային քարտեզներով «Ադրբեջանին պատկանող տարածքներ» արտահայտությունը: Ռուսական մամուլը Երևանից հնչող հայտարարություններից առանձնացրել է այսօր վարչապետ Փաշինյանի արձագանքն այն մասին, որ Անկարայից ստացվում են դրական ազդակներ, իսկ ադրբեջանական մամուլն էլ ակտիվ տարածում է Փաշինյանի մեկ այլ հայտարարություն ճանապարհների շրջափաման մասին, որտեղ նա օգտագործել է ադրբեջանական Էյվազլի և Չայզամի անվանումները:
Ադրբեջանի նախագահն էլ երեկ հերթական անգամ հայտարարել է, թե «Սյունիքն ադրբեջանական պատմական տարածք է», և թե Հայաստանը չի կարելի համարել անկախ պետություն, քանի որ չի կարող ապահովել իր անվտանգությունը և չի կարող պաշտպանել իր սահմանները:
