Միջազգային մամուլը շարունակում է փաստական տվյալներ ներկայացնել Լեռնային Ղարաբաղում ծավալված ռազմական գործողություններին սիրիացի վարձկանների մասնակցության վերաբերյալ։
AFP գործակալությունն, օրինակ, վկայակոչելով իր աղբյուրները, պնդում է, որ այս պահին էլ Թուրքիայի փաստացի վերահսկողության տակ գտնվող սիրիական Իդլիբ նահանգում զինյալներ կան, որ սպասում են Ադրբեջան վերատեղակայմանը։ Ֆրանսիական գործակալությանը հաջողվել է կապ հաստատել նրանցից մեկի հետ։ 26-ամյա երիտասարդը ներկայացել է որպես Աբու Ահմադ՝ էլեկտրոնային նամակագրության ընթացքում խոստովանելով AFP-ի թղթակցին, որ Ադրբեջանում, հայերի դեմ մարտնչելու դիմաց իրեն ամսական 2000 դոլար են խոստացել։
«Ես Ադրբեջան մեկնելու մասին պայմանագիրը ստորագրել եմ մեկ շաբաթ առաջ», - գրել է սիրիացի զինյալը՝ նշելով նաև, թե տեղյակ է, որ Լեռնային Ղարաբաղ մեկնած սիրիացի առաջին խմբերում զոհեր կան։
«Ես ընտրություն չունեմ, պետք է ինչ-որ կերպ կերակրեմ իմ ընտանիքը», - նշել է սիրիացին։
AFP-ի թղթակցին հաջողվել է նաև կապ հաստատել արդեն իսկ Ադրբեջան տեղափոխված մեկ այլ սիրիացի զինյալի հետ։ Նա հաստատել է, որ գտնվում է Ադրբեջանում՝ հրաժարվելով հավելյալ մանրամասներ հաղորդել։
AFP-ի թղթակցին, սակայն, հաջողվել է զինյալի հայրենիքում՝ Հալեպի նահանգի Աթարեբ քաղաքում գտնվող աղբյուրներից պարզել, որ նա ընդգրկված է այն նույն ստորաբաժանաման կազմում, որի հրամանատարն էր Մոհամադ Շաաբանը։ Վերջինի մահվան մասին արևմտյան լրատվամիջոցները, մասնավորապես, բրիտանական BBC-ն հայտնել էին դեռ չորս օր առաջ։
Լոնդոնում գործող «Սիրիայում մարդու իրավունքների դիտարկման կենտրոն» իրավապաշտպան կառույցի տվյալներով էլ Լեռնային Ղարաբաղում զոհված սիրիացիների թիվը այսօր հասել է 72-ի:
Կենտրոնի տվյալներով, ի դեպ, չնայած սիրիացի զինյալների շրջանում նկատվող ծանր կորուստներին, թուրքական իշխանությունները չեն հրաժարվում նրանց Ղարաբաղ ուղարկելու մտադրությունից։
«Նախօրեին մեր աղբյուրներից տեղեկացանք, որ անվտանգության ոլորտի թուրքական ընկերությունները և թուրքական հետախուզությունը Սիրիայում գործող թուրքամետ խմբավորումների մեծաթիվ զինյալներին շարունակում են Ադրբեջան տեղափոխել և մարզել», - կարդում ենք «Մարդու իրավունքների դիտարկման սիրիական կենտրոն»-ի կայքում: Կառույցը նաև պնդում է, որ Սիրիայի հյուսիսից Ադրբեջան տեղափոխված զինյալների քանակը արդեն իսկ հասել է 1200-ի, որոնց մեծամասնությունն ազգությամբ թուրքմեն է։
Իդլիբի նահանգում գտնվող իր աղբյուրները վկայակոչելով՝ սիրիացիների հավաքագրման որոշ մանրամասներ է հաղորդում նաև մոսկովյան «Նովայա Գազետա»-ն։ Պարբերականի տեղեկություններով՝ վարձկանների հավաքագրմամբ զբաղվում է ազգությամբ թուրքմեն Սեիֆ Աբու Բաքրը։
«Նա Թուրքիայի հետ սերտ առնչություններ ունեցող Սիրիական ազատ բանակի կազմում գործող «Համզաթ» դիվիզիայի հավաքագրման գծով պատասխանատուն է։ Զինյալների գրանցումը տեղի է ունենում Աֆրին քաղաքում գտնվող ոչ մեծ գրասենյակում», - գրում է «Նովայա Գազետա»-ն։
Թերթի տեղեկություններով՝ զինյալներին հավաքում են 300 հոգանոց խմբերում, տեղափոխում Սիրիային սահմանակից թուրքական Քիլիս քաղաք, այնտեղից էլ Գազիանթեփ։ «Այդտեղ նրանց քաղաքացիական հագուստ են տրամադրում և Ստամբուլով ուղարկում Բաքու», - գրում է ռուսական թերթը։
«Նովայա Գազետա»-ի տեղեկություններով, ի դեպ, թուրքական կողմն անում է ամեն ինչ «վարձկանությունը հրապուրիչ դարձնելու համար»։
Ամսական աշխատավարձը կազմում է 1800 դոլար։ Զինյալներին և նրանց ընտանիքի անդամներին նաև թուրքական քաղաքացիություն է երաշխավորվում։ «Հարազատներին թուրքական քաղաքացիություն է խոստացվել անգամ զինյալի մահվան դեպքում», - գրում է թերթը, պնդելով նաև թե սիրիացի վարձկանի՝ Ղարաբաղում զոհվելու դեպքում թուրքական իշխանությունները նրանց ընտանիքներին 30 հազար դոլար միանվագ օգնություն են խոստանում։
