“Газпром” можа спыніць пастаўкі газу ва Ўкраіну

Сяргей Купрыянаў ўдакладніў, што размова ідзе толькі пра расейскі газ, доля якога у агульных пастаўках на Ўкраіну складае 25 працэнтаў. “Газпром” праз свайго партнэра кампанію “РосУкрЭнэрга” прадае Ўкраіне расейскі газ, а таксама набыты Кіевам ў Туркмэністане, Узбэкістане і Казахстане.

Згодна з падпісаным пры канцы мінулага году пагадненьнем сёлета “РосУкрЭнэрга” павінна паставіць Украіне 55 мільярдаў кубамэтраў газу. Ад 1-га студзеня газ для Ўкраіны падаражэў на 38 працэнтаў да амаль 180 даляраў за тысячу кубамэтраў. З прычыны незвычайных халадоў ў сярэднеазіяцкіх рэспубліках і дэфіцыту паліва на ўнутраных рынках гэтых краінаў, ад пачатку студзеня Ўкраіна была вымушаная дакупляць расейскі газ на цане 314 даляраў за тысячу кубамэтраў. У выніку гэтага ўкраінскія выдаткі на газ павялічыліся на 3 мільярды даляраў.

Паводле ўкраінскага боку прэтэнзіі “Газпрому” павінны быць адрэсаваныя ня Кіеву, але пасярэдніку – кампаніі “ РосУкрЭнэрга”.

“Я не выключаю, што “РосУкрЭнэрга” прыбрала грошы ў ценявы сэктар і не расплацілася з Расеяй”, заявіла прэм’ер Украіны Юлія Цімашэнка.

Яна патлумачыла і ранейшыя збоі з пастаўкамі газу ў 2006 годзе “непрафэсійнасьцю і карумпаванасьцю” “РосУкрЭнэрга”. Паводле яе, пагрозы з боку “Газпрому” сьведчаць аб тым, што Кіеў меў абсалютную рацыю, спрабуючы прыбраць з рынку гэтага несаліднага пасярэдніка, бо пасярэднікі кшталту “ РосУкрЭнэрга” Ўкраіне цалкам не патрэбныя. Яны зрываюць і разьлікі з Расеяй, і пастаўкі газу ва Ўкраіну.

“Трэба перагледзець схемы паставак газу ва Украіну і ўмовы транзыту расейскага газу па тэрыторыі Ўкраіны”, адзначыла Цімашэнка. Яна запэўніла, што пастаўкі газу ў Эўропу будуць стабільнымі і бязь збояў.

Тым ня меней, прадстаўнікі “Нафтагазу Ўкраіны” накіраваліся ў Маскву на перамовы з “Газпромам”, а прадстаўнік расейскага канцэрну Сяргей Купрыянаў заявіў, што перш чым пераходзіць на новыя схемы паставак, трэба расплаціцца за старыя.