Армэнія дазволіла выезд са сваёй тэрыторыі грамадзянцы Беларусі, якая знаходзілася на запыт беларускіх уладаў у міжнародным вышуку па палітычных матывах.
Пра гэта паведаміла прэс-служба намесьніка кіраўніка Аб'яднанага пераходнага кабінэта і кіраўніка Народнага антыкрызіснага ўпраўленьня Паўла Латушкі.
У 2020 годзе Натальля (імя зьменена з меркаваньняў бясьпекі) ўдзельнічала ў мірных пратэстах і ўваходзіла ў кіраўніцтва аднаго з чатаў, дзе беларусы абмяркоўвалі сытуацыю ў краіне. Яе затрымлівалі па палітычных артыкулах, і пасьля допыту яна была вымушана пакінуць Беларусь.
У 2025 годзе, падчас падарожжа, калі Натальля прызямлілася ў Армэніі, ёй паведамілі, што яна ня можа пакінуць краіну, бо знаходзіцца ў міжнародным вышуку на запыт беларускіх уладаў.
У падтрымку Натальлі выступілі Офіс Сьвятланы Ціханоўскай, намесьнік кіраўніцы АПК, кіраўнік НАУ Павал Латушка, «Вясна», фонды BySol і ByHelp, адвакатка Марыя Колесава-Гудзіліна, а таксама прававая камісія Каардынацыйнай Рады. Юрыдычную падтрымку ў Армэніі аказвала арганізацыя «Грамадзкі вэрдыкт».
У выніку пасьля разгляду справы Пракуратура Армэніі выдала афіцыйны дазвол на выезд грамадзянкі Беларусі. Беларуска ўжо прыбыла ў Эўрапейскі зьвяз.
Форум