У Менску асудзілі бізнэсоўца Юрыя Марозава паводле палітычнай справы
Крымінальную справу супраць 60-гадовага бізнэсоўца і і былога ганаровага консула Беларусі ў Мэксыцы Юрыя Марозава разгледзелі ў Менскім гарадзкім судзе 29 кастрычніка.
Яго абвінавацілі ва ўдзеле ў пратэстах (ч. 1 арт. 342) і садзейнічаньні экстрэмісцкай дзейнасьці (ч. 1 і 2 арт. 361-4). Сутнасьць абвінавачваньня праваабаронцам невядомая.
Вырак — 5 гадоў калёніі ўзмоцненага рэжыму.
Нядаўна да 2 гадоў пазбаўленьня волі асудзілі і ягоную жонку Марыну.
Юры Марозаў жыў у Менску, у ягонай сям’і 2 дачкі.
Паводле BelPol, Марозаў узначальваў кампанію «Белфармайс», якая займалася аптовым гандлем фармацэўтычнымі, вэтэрынарнымі, мэдыцынскімі і артапэдычнымі таварамі.
Ён быў адным са стваральнікаў беларуска-нямецкага прадпрыемства «Белфарм», а таксама яго генэральным дырэктарам.
У афіцыйных дакумэнтах пазначана, што ў 1997–2004 гадах ён уваходзіў у сакратарыят Савету Рэспублікі і Палаты прадстаўнікоў Нацыянальнага сходу.
Падчас перадвыбарчай кампаніі ён прыпыніў сяброўства ў Абʼяднанай грамадзянскай партыі, а ўжо ў траўні 2001 году ўзначаліў дэпутацкую групу «Адзінства».
Акрамя палітычнай і бізнэс-дзейнасьці, Марозаў быў ганаровым консулам Беларусі ў Мэксыцы.
У 2016 годзе Юрый Марозаў таксама фігураваў сярод акцыянэраў менскай крамы «Лакомка».
Ягоную жонку Марыну Марозаву асудзілі ў судзе Савецкага раёна Менску за ўдзел у пратэстахпаводле (ч. 1 арт. 342) на 2 гады калёніі. 17 кастрычніка яе ўнесьлі ў «сьпіс экстрэмістаў», паведаміла «Вясна».
«Што Лукашэнка не перамог, для мяне відавочна»
У праваабарончым цэнтры «Вясна» пацьвердзілі інфармацыю «Нашай нівы» аб тым, што былому падпалкоўніку і выкладчыку Вайсковай акадэміі Фёдару Кандзіранду прысудзілі два з паловай гады калёніі за «садзейнічаньне экстрэмісцкай дзейнасьці» (ч. 1 і 2 арт. 361‑4 Крымінальнага кодэксу). Мужчыну арыштавалі ў сакавіку 2025 году, у верасьні над ім адбыўся суд.
Кандзіранда працаваў старшым выкладчыкам на катэдры тактыкі Вайсковай акадэміі з 2008 па 2020 год.
У жніўні 2020 году Кандзіранда не падтрымаў гвалт на вуліцах Беларусі. У кастрычніку таго ж году ён звольніўся з акадэміі паводле артыкулу, які не даваў яму права на вайсковую пэнсію, і пайшоў працаваць у IT, застаючыся ў Беларусі.
«Тое, што Лукашэнка не перамог, для мяне відавочна», — казаў Фёдар Кандзіранда журналістам РС у лістападзе 2020 году, спасылаючыся ня толькі на настроі сваякоў, сяброў і знаёмых, але і на тое, што ўбачыў у дзень асноўнага галасаваньня на выбарчым участку.
Праз год Фёдара Кандзіранду, як і яшчэ 80 былых сілавікоў, пазбавілі вайсковага званьня.
Праваабаронцы не выключаюць, што былы падпалкоўнік Фёдар Кандзіранда асуджаны ў «справе Гаюна».
Фёдара Кандзіранду прызналі палітвязьнем, паводле «Вясны», ён знаходзіцца ў турме № 4 у Магілёве.
Жыхара Пінску завочна асудзілі за ўдзел у пратэстах у 2020 годзе
54-гадовага жыхара Пінску Андрэя Кузьменчука завочна асудзілі за ўдзел у акцыях пратэсту ў 2020 годзе. Інфармацыю аб прысудзе разьмясьцілі на сайце Вярхоўнага суду 18 ліпеня, але заўважылі яго толькі цяпер.
Суд Пінскага раёну і Пінску прызнаў мясцовага жыхара вінаватым «ва ўдзеле ў масавых беспарадках, якія выявіліся ў непасрэдным зьдзяйсьненьні гвалту над асобай, пагромаў, зьнішчэньня маёмасьці» (ч. 2 арт. 293 КК) і прызначылі 4 гады калёніі ва ўмовах узмоцненага рэжыму. Мужчыну ўключылі ў сьпіс «тэрарыстаў».
Згодна з інфармацыяй праваабаронцаў, усяго за ўдзел у пратэстах у жніўні 2020 году ў Пінску асудзілі больш за 68 чалавек, палову зь іх да пазбаўленьня волі.
У «сьпіс тэрарыстаў» КДБ дадаў яшчэ 8 чалавек
- Натальля Васільева
- Юлія Зароўская
- Андрэй Кавалёў
- Сяргей Лысенка
- Дзяніс Пяткевіч
- Сяргей Цімашэнка
- Вольга Чукарава
- Віктар Шабалін
Цяпер у «тэрарыстычным сьпісе» 1400 чалавек, зь іх 658 — беларусы, піша «Вясна».
Праваабаронцы прызналі палітвязьнямі 12 чалавек
- Андрэй Вусік
- Ілона Гарбуновіч
- Фёдар Кандыранда
- Галіна Лагутоўская
- Аляксандр Махнач
- Аляксандр Маркін
- Юрый Марозаў
- Віталь Марэцкі
- Алег Пінчук
- Дзмітрый Рожын
- Валянцін Талкач
- Сяргей Шкодзін
Усіх іх асудзілі за ўзаемадзеяньне з «экстрэмісцкімі фармаваньнямі», а Галіну Лагутоўскую яшчэ і за дыскрэдытацыю РБ, абразу прадстаўніка ўлады, а таксама Лукашэнкі (і паклёп на яго), піша «Вясна».
Цяпер у Беларусі 1249 палітычных вязьняў, пра якіх ведаюць праваабаронцы «Вясны». Паводле праваабарончай ініцыятывы Dissidentby, палітвязьняў 1360. Розныя ініцыятывы выкарыстоўваюць розныя крытэры ўлучэньня ў сьпіс.
У Горадні завочна асудзілі лейтэнанта запасу на 13 гадоў калёніі за «здраду дзяржаве»
Праваабаронцам стала вядома пра завочны прысуд, вынесены ў Горадзенскім абласным судзе яшчэ 9 чэрвеня.
Віктара Дамарацкага асудзілі за «здраду дзяржаве» (ч.1 арт. 356 КК), абвінаваціўшы ў дапамозе замежнай дзяржаве ў дзейнасьці, накіраванай на шкоду Беларусі.
На разгляд справы суду спатрэбілася пара тыдняў.
У дадатак да 13 гадоў калёніі ўзмоцненага рэжыму Дамарацкага аштрафавалі на 12 600 рублёў і пазбавілі званьня «старшы лейтэнант запасу», паведаміла «Вясна».
Прызналі «экстрэмісцкай» арганізацыю «Gero kaimyno agentūra, VšĮ»
«Экстрэмісцкай арганізацыяй» прызналі 24 кастрычніка зарэгістраваную ў Літве арганізацыю «Gero kaimyno agentūra, VšĮ», паведаміла «Вясна».
Што гэта за арганізацыя — невядома. Назва азначае «Агенцтва добрага суседа, публічная ўстанова». Згодна з інфармацыяй з адкрытых крыніц, ідзецца пра юрыдычную ўстанову.
Паводле інфармацыі «Вясны», прызнаньне «Gero kaimyno agentūra» «экстрэмісцкай» арганізацыяй зьвязана зь перасьледам людзей у «справе дваровых чатаў» — яна мае дачыненьне да «экстрэмісцкага фармаваньня» «Ордэн», куды ўваходзіць шэраг дваровых чатаў.
Арганізацыя афіцыйна зарэгістраваная, таму яе прызнавалі «экстрэмісцкай» празь Вярхоўны суд.
Улады дапоўнілі сьпіс «экстрэмісцкіх» матэрыялаў
У сьпіс трапілі сайты partisanresults.cоm, belarus2020.оrg, а таксама старонка ў TikTok volyabela.
Як рэжым Лукашэнкі выкарыстоўвае ярлык «экстрэмізму», каб душыць свабоду слова і змагацца з палітычнымі апанэнтамі
Пасьля сфальшаваных прэзыдэнцкіх выбараў 2020 году і сілавога здушэньня агульнанацыянальных пратэстаў аўтарытарны рэжым Аляксандра Лукашэнкі пачаў сыстэматычна выкарыстоўваць антыэкстрэмісцкае заканадаўства для барацьбы з іншадумствам, ліквідацыі незалежных мэдыя і перасьледу палітычных апанэнтаў.
Улады заблякавалі сайты незалежных мэдыя і спынілі публікацыю непадкантрольных друкаваных выданьняў, пазбавілі акрэдытацыі журналістаў іншаземных мэдыя і разграмілі офісы самых уплывовых СМІ. Сотні беларускіх рэпартэраў прайшлі праз арышты, дзясяткі застаюцца ў турмах. Усе незалежныя мэдыя, якія асьвятляюць грамадзка-палітычны парадак дня ў Беларусі, цяпер працуюць выключна з-за мяжы.
Ад 2021 году ўлады пачалі масава абвяшчаць вэб-сайты і асобныя ўліковыя запісы ў сацыяльных сетках незалежных мэдыя, палітычных і грамадзкіх арганізацый, ініцыятыў і проста блогераў «экстрэмісцкімі матэрыяламі», а іх аўтараў «экстрэмісцкімі фармаваньнямі» — часта без судовага разгляду.
Рэспубліканскі сьпіс экстрэмісцкіх матэрыялаў вядзе Міністэрства інфармацыі Беларусі. На дадзены момант у сьпісе на 1469 старонках пералічаны тысячы «экстрэмісцкіх матэрыялаў», за выкарыстаньне якіх прадугледжаная адказнасьць. У сьпісе — сайты, тэлеграм-каналы, акаўнты, старонкі ў сацыяльных сетках, відэаролікі і артыкулы ў інтэрнэце, маркі, значкі, CD-дыскі, а таксама кнігі, у тым ліку мастацкія.
На канец 2024 году больш за 6500 онлайн-рэсурсаў былі забароненыя такім чынам. За любое ангажаваньне з уключанымі ў экстрэмісцкі сьпіс рэсурсамі — ці гэта «падабайка», ці камэнтар, ці падпіска на канал — у Беларусі пагражае крымінальная адказнасьць. Удзел у «экстрэмісцкім фармаваньні» можа карацца турэмным зьняволеньнем да 10 гадоў.
Ужо тысячы беларусаў прайшлі праз штрафы, арышты і турэмнае зьняволеньне за «экстрэмізм».
Паводле ацэнкі Ўпраўленьня Вярхоўнага камісара ААН у правах чалавека, улады Беларусі «выкарыстоўваюць ярлык „экстрэмізм“ для падаўленьня іншадумства, адвольна клясыфікуючы дзеяньні, апісаныя як распаўсюд ілжывай інфармацыі, абразу службовых асобаў, дыскрэдытацыю інстытутаў, арганізацыю масавых беспарадкаў, заклікі да санкцый і распальваньне сацыяльнай варожасьці, як „экстрэмісцкія“, якія падлягаюць крымінальнаму перасьледу».
Форум