Былы палітвязень, лідэр АГП Мікалай Казлоў зьехаў зь Беларусі. Неўзабаве выступіць у Брусэлі

17 кастрычнік 2025, 17:21

Радыё Свабода

Былы палітвязень, палітык, старшыня зьліквідаванай уладамі Аб’яднанай грамадзянскай партыі Мікалай Казлоў зьехаў з краіны некалькі тыдняў таму. Чакаецца, што 20 кастрычніка экс-палітвязень выступіць на прэс-канфэрэнцыі ў Брусэлі, паведамляе офіс Сьвятланы Ціханоўскай.

Мікалай Казлоў — ляўрэат прэміі Буша — Тэтчэр «За свабоду», «Чалавек году-2010» па вэрсіі «Нашай Нівы», давераная асоба Сьвятланы Ціханоўскай на выбарах 2020 году.

6 жніўня 2021 года Казлова асудзілі на 3 месяца арышту за разгалошваньне дадзеных сьледзтва па справе Каардынацыйнай рады. 27 ліпеня 2022 года яго зноў затрымалі разам з іншымі сябрамі АГП і абвінавацілі ва ўдзеле ў «Маршы новай Беларусі» у Менску ў 2020 годзе

Мікалаю прысудзілі 2,5 гады калёніі. Казлоў на судзе заявіў, што не разумее, у чым яго абвінавачваюць, бо гэта сумесь «дзіўнай лёгікі і нястрымнай фантазіі». На пытаньне суду, ці прызнае сваю віну, ён адказаў: «Я прызнаю сябе больш пацярпелым, чым вінаватым».

У пачатку траўня 2023 году ў Казлова памерла маці. Мікалая не адпусьцілі з калёніі на пахаваньне. У сярэдзіне сьнежня 2023 году стала вядома, што палітыка ў лістападзе зьмясьцілі ў ПКТ на 2 месяцы.

Казлоў цалкам адбыў тэрмін і ў 2024 годзе выйшаў на волю.

Мікалай Казлоў працаваў на працягу 17 гадоў старшым опэрупаўнаважаным па асабліва важных справах крымінальнага вышуку УУС Цэнтральнага раёна Менска, за гэтыя гады раскрыў сотні злачынстваў. Ахоўваючы парадак на выбарчым участку ў час парлямэнцкіх выбараў 2008 года, ён абвінаваціў кіраўніцтва ўчастковай камісіі ў фальсыфікацыях. Казлоў напісаў пра гэта рапарт начальству, а калі захадаў ніхто не зрабіў, паведаміў у незалежную прэсу. Казлова прасілі адклікаць рапарт, каб замяць справу, але ён праявіў прынцыповасьць і неўзабаве пайшоў у запас.
У 2012 годзе ўступіў у Аб’яднаную грамадзянскую партыю, у ліпені 2016 года абраны намесьнікам старшыні партыі, потым стаў старшынём парты. 4 траўня 2021 года Лукашэнка пазбавіў яго спэцыяльнага званьня падпалкоўніка міліцыі запасу.
15 жніўня 2023 года Вярхоўны суд задаволіў пазоў Міністэрства юстыцыі і ліквідаваў АГП. Фармальнай прычынай стала тое, што партыя — насуперак абноўленаму заканадаўству — не падала дакумэнты на перарэгістрацыю. Палітычная структура працягвае дзейнасьць, у прыватнасьці за межамі Беларусі. Выканаўцам абавязкаў старшыні АГП зьяўляецца Ўладзімір Шанцаў, які знаходзіцца па-за межамі Беларусі.