Пасьля прылёту зь Беларусі дрона «Гербера» Літва перакінула сыстэмы СПА блізкага радыюсу дзеяньня бліжэй да мяжы зь Беларусьсю, заявіў начальнік Генэральнага штабу Раймундас Вайкшнарас.
Паводле яго словаў, якія цытуе партал Delfi, калі б бесьпілётны апарат «Гербера» зноў парушыў паветраную прастору Літвы, «яго б хутчэй выявілі і ён быў бы зьнішчаны».
«На віленскім кірунку мы ўзмацнілі пільнасьць і магчымасьць зьнішчаць, гэта справа ўжо не хвілін, не гадзін, а сэкундаў, калі будуць рашэньні», — сказаў Вайкшнарас.
Гаворачы аб сумесных расейска-беларускіх вучэньнях «Захад-2025», начальнік штабу заявіў, што правакацыі ў гэты пэрыяд на літоўскай тэрыторыі «малаімаверныя». Вайкшнарас адзначыў, што сур’ёзных рызык цяпер няма.
Паводле яго сьцьверджаньня, у часе згаданых вучэньняў у Літве, Латвіі, Эстоніі і Польшчы напагатове будуць блізу 40 тысяч вайскоўцаў — «усюды, ня толькі на сушы, але і на моры, і ў паветры».
Увосень літоўскае войска возьме ўдзел у вучэньнях «Гром Пяркунаса», у рамках якіх будзе адпрацаванае «апэратыўнае плянаваньне», а таксама праведзеныя «палявыя тактычныя вучэньні для трэнаваньня навыкаў кіраваньня на розных узроўнях і інтэграцыі рэзэрвістаў у абарону». Паводле Вайкшнараса, на гэтых вучэньнях Літва і яе хаўрусьнікі заплянавалі «больш магчымасьцяў, чым заплянавана для вучэньняў „Захад-2025“ у Беларусі».
10 ліпеня ў Літву зь Беларусі заляцеў расейскі дрон. Раніцай 28 ліпеня паліцыя папярэдзіла грамадзян аб уварваньні з тэрыторыі Беларусі БПЛА нявызначанага тыпу.
16 ліпеня Міністэрства замежных справаў Літвы ўручыла часоваму паверанаму ў справах Беларусі ноту з рашучым пратэстам у сувязі зь «незаконным парушэньнем паветранай прасторы шматфункцыянальным бесьпілётным лётным апаратам „Гербера“ расейскай вытворчасьці».
Форум