Ксяндза Анджэя Юхневіча, асуджанага на 13 гадоў пазбаўленьня волі, перавялі ў калёнію № 2 ў Бабруйску, піша партал Katolik.life.
Былы пробашч апынуўся ў той жа калёніі, дзе трымаюць і другога асуджанага каталіцкага сьвятара — ксяндза Генрыха Акалатовіча.
Пасьля суду, які пакараў Анджэя Юхневіча 13 гадамі зьняволеньня, яго трымалі ў СІЗА Віцебску і Гомлі.
Сьвятара затрымалі 8 траўня 2024 году, суд над ім адбыўся амаль праз год, у красавіку 2025 году ў Шуміліне. Судовы працэс праходзіў у закрытым рэжыме. У чым канкрэтна абвінавацілі сьвятара, якога перш затрымлівалі з «палітычных» матываў, — дакладна невядома. З судовага раскладу вынікала, што яму ставілі ў віну тры крымінальныя артыкулы, якія тычацца полавых зносінаў зь непаўналетнімі.
Паводле зьвестак, якія дайшлі да крыніцаў выданьня Katolik.life, у справе ксяндза ідзецца пра падзеі 10-гадовай даўніны. Юхневіча асудзілі на 13 гадоў зьняволеньня. Працэс тады вяла старшыня суду Шумілінскага раёну Іна Грабоўская.
Вядома, што Анджэй Юхневіч не прызнаваў ніякай віны, вернікі лічаць, што справа супраць яго сфабрыкаваная.
Юхневіч стаў другім пасьля Акалатовіча каталіцкім сьвятаром у Беларусі, якога асудзілі апошнім часам.
