Цяпер на службе ў літоўскіх памежнікаў зьявіліся тры новыя шматмэтавыя верталёты Airbus H145 D3. Іх набылі ў кампаніі Airbus Helicopters Deutschland GmbH за 57 мільёнаў эўра. Прычым два зь іх набытыя коштам дзяржаўнага бюджэту (46 мільёнаў эўра), а адзін — коштам фінансаваньня Эўразьвязу (11 мільёнаў эўра).
Як было заяўлена на прэзэнтацыі, верталёты абсталяваныя аптычнымі і цеплавізійнымі камэрамі, сыстэмамі перадачы відэа ў рэжыме рэальнага часу, сучаснай сувязьзю. Іх будуць выкарыстоўваць для назіраньня за дзяржаўнай мяжой, пошукава-ратавальных апэрацыяў, выведкі і тушэньня пажараў, падтрымкі сілаў спэцыяльных апэрацыяў ARAS, а таксама для дапамогі іншым установам і ўдзелу ў міжнародных апэрацыях.
Адзін зь верталётаў будзе дадаткова кантраляваць «калінінградзкі транзыт». Зь яго дапамогай будзе ўзмоцнены маніторынг цягнікоў, якія праяжджаюць з тэрыторыі Беларусі празь Літву ў Калінінградзкую вобласьць Расеі і назад.
Асаблівасьць двух верталётаў — спэцыяльнае абсталяваньне для радыяцыйнай выведкі, у тым ліку на тэрыторыях, блізкіх да Беларускай АЭС.
З словаў літоўскіх памежнікаў, такая тэхніка дазволіць весьці маніторынг вялікіх тэрыторыяў, а таксама ў рэжыме 24/7 апэратыўна рэагаваць і прагназаваць сытуацыю ў выпадку аварыі на беларускай станцыі.
«Цяпер мы можам выратаваць людзей, якія апынуцца ў зоне бедзтва. Напрыклад, пры паводцы, пажары і гэтак далей. Асабліва калі ідзецца пра радыяцыю, скажам, заражэньне, мы зможам выратаваць людзей, вывезьці іх з зонаў заражэньня. Бо з нашымі меншымі верталётамі мы не маглі гэтага зрабіць, у нас не было спэцыяльнага абсталяваньня», — пракамэнтаваў Свабодзе новыя верталёты намесьнік камандзіра Дзяржаўнай памежнай службы Антанас Монтвідас.
Плянуецца, што верталёты будуць прымаць удзел у міжнародных апэрацыях, арганізаваных разам з Эўрапейскім агенцтвам аховы межаў Эўразьвязу Frontex, зь Міжнародным агенцтвам атамнай энэргіі (МАГАТЭ), а таксама з эўрапейскай сеткай антытэрарыстычных падраздзелаў ATLAS.
Бесьпілётны авіяцыйны комплекс вэртыкальнага ўзьлёту латвійскай кампаніі EDGE Autonomy, які таксама цяпер будуць выкарыстоўваць літоўскія памежнікі, набыты ў межах праграмы Эўразьвязу за 2,42 мільёна эўра.
Яго асноўнае прызначэньне — маніторынг дзяржаўнай мяжы ў цяжкадаступных раёнах на мяжы зь Беларусьсю і Калінінградзкай вобласьцю Расеі, фіксацыя незаконнай міграцыі і кантрабанды ў рэжыме рэальнага часу. Сыстэма інтэграваная ў рэзэрвы тэхнічнага абсталяваньня Эўрапейскага агенцтва аховы межаў Эўразьвязу Frontex, таксама плянуецца яе выкарыстаньне ў міжнародных апэрацыях.
«У нас надзвычайная сытуацыя на мяжы зь Беларусьсю, і мы бачым, што ў Польшчы і Латвіі ня лепшая, — сказаў Свабодзе міністар унутраных справаў Літвы Ўладзіслаў Кандратовіч.— Але сытуацыя падкантрольная. Чаму так? Таму што ў тым ліку мы ўклалі шмат грошай у будаўніцтва сьцяны і набыцьцё спэцыяльнага абсталяваньня. І гэтыя інвэстыцыі даюць плён».
Форум