Гэты вынік, як мяркуецца, утрымае Румынію на празаходнім шляху, піша Румынская служба Радыё Свабодная Эўропа / Радыё Свабода.
Асобныя апытаньні, праведзеныя Avangarde і CURS, даюць Нікушору Дану нечаканую перамогу, ён атрымлівае крыху больш за 54 працэнта апытаных на выхадах з участкаў для галасаваньня ў другім туры выбараў. Але гэтыя апытаньні ня ўлічваюць вынікі галасаваньня за мяжой, у тым ліку ў Малдове, дзе шмат жыве грамадзян Румыніі.
Яўка склала больш за 64 працэнты — гэта рэкордны паказчык — прагаласавала каля 11,6 мільёна румынаў з самой краіны і за мяжой, што на два мільёны больш, чым у першым туры, і больш, чым на першапачатковым галасаваньні ў лістападзе мінулага года, якое было анулявана з-за абвінавачваньняў ва ўмяшаньні Расеі ў кампанію.
«Ёсьць супольнасьць, якая прайграла сёньняшнія выбары. Супольнасьць, якая абураная тым, як дагэтуль праводзілася палітыка, настолькі абураная, што лічыць адзіным рашэньнем рэвалюцыю», — сказаў Дан неўзабаве пасьля публікацыі вынікаў экзыт-полаў.
«Наш абавязак — пераканаць іх, што рэформа правасудзьдзя і барацьба з карупцыяй будуць на першым месцы».
Джорджэ Сім’ён быў прызваны на замену Кэліну Джарджэску, якому не дазволілі балятавацца пасьля таго, як ён перамог у першым туры галасаваньня ў лістападзе.
Сім’ён разьвіў посьпех Джарджэску, атрымаўшы каля 41 працэнта падтрымкі ў першым туры галасаваньня 4 траўня. Дан тады быў на другім месцы з 21 працэнтам. У большасьці апытаньняў, праведзеных з таго часу, Джорджэ Сім’ён лідзіраваў, хоць апошнія апытаньні казалі пра роўныя шанцы кандыдатаў.
Джорджэ Сім’ён, лідэр партыі AUR, адхіліў вынікі экзыт-полаў, заявіўшы, што яго вынікі выбараў паказваюць, што ён нібы выйграў галасаваньне з розьніцай прыкладна ў 400 000 бюлетэняў.
«Я буду прэзыдэнтам усіх румынаў, таму я буду і вашым прэзыдэнтам», — сказаў Сім’ён у сваёй прамове, у якой сьцьвярджаў, што перамог.
«Я дзякую мільёнам людзей, якія зрабілі перамогу магчымай. Гэта перамога чалавека, які павінен быў стаць прэзыдэнтам Румыніі, гэта перамога Каліна Джарджэску».
Афіцыйныя вынікі чакаюцца пазьней.
Форум