«Пэўныя дзеяньні плянуюцца залежна ад таго, што мы пабачым па той бок, якія расейскія і беларускія сілы будуць задзейнічаныя ў гэтых вучэньнях, і гэта, безумоўна, не застанецца без увагі», — працытавала агенцтва BNS Кястуціса Будрыса, паведаміла выданьне LRT.
Міністар замежных спраў Літвы не канкрэтызаваў пляны NATO, але запэўніў, што альянс адрэагуе з улікам таго, як будуць праходзіць вучэньні.
«Цяпер я сапраўды не хацеў бы казаць падрабязна пра тое, якім будзе рэагаваньне. Але гэта ня проста нейкая адна з шэрагу падзея, усе такія намаганьні ўспрымаюцца сур’ёзна. Мы паглядзім, якія віды войскаў там будуць, па колькасьці, па геаграфічным палажэньні, і NATO, безумоўна, на падставе гэтага сфарміруе свае ўласныя, скажам так, прысутнасьць або адказ», — дадаў Кястуціс Будрыс.
Выданьне паведаміла, што літоўскія вайскоўцы, грунтуючыся на выведных зьвестках ад усяго блёку NATO, пакуль ня бачаць ніякіх дадатковых ваенных пагроз для Літвы ў часе сёлетніх вучэньняў «Захад» у Беларусі. Яны сьцьвярджаюць, што, як і летась, галоўнай пагрозай будуць рызыкі «ненаўмысных інцыдэнтаў».
Прэзыдэнт Літвы Гітанас Наўседа ў лютым 2025 году заявіў, што вучэньні «Захад» не павінны выклікаць дадатковых пабойваньняў, паколькі Літва і яе хаўрусьнікі таксама праводзяць вучэньні і рыхтуюцца да патэнцыйных пагроз.
Трэцяга красавіка стала вядома, што ў Беларусі ў верасьні адбудуцца тры вайсковыя вучэньні Арганізацыі Дамовы аб калектыўнай бясьпецы (АДКБ) — «Узаемадзеяньне-2025», «Пошук-2025» і «Эшалон-2025 —, задум якіх цесна зьвяжуць з мэтамі стратэгічных расейска-беларускіх вучэньняў «Захад-2025».
Форум