У судзе Заводзкага раёну Менску 2 красавіка асудзілі 64-гадовую Жанну Вайніловіч, якую затрымалі пасьля вяртаньня з Польшчы. Яе абвінавацілі ва ўдзеле ў пасьлявыбарчых акцыях пратэсту ў Менску ў 2020 годзе.
Жанчыне пасьля двух месяцаў у СІЗА прызначылі два гады «хатняй хіміі», піша Праваабарончы цэнтар «Вясна».
Жанну Вайніловіч затрымалі ў Бабруйску 28 студзеня — празь некалькі дзён пасьля вяртаньня з Польшчы.
Праваабаронцам «Вясны» стала вядома пра яе затрыманьне ў канцы студзеня.
Вайніловіч інкрымінавалі арт. 342 КК («актыўны ўдзел у дзеяньнях, што груба парушаюць грамадзкі парадак») за ўдзел у пасьлявыбарчых акцыях пратэсту.
Праваабаронцы раяць сур’ёзна ацэньваць рызыкі перад паездкай у Беларусь і не забывацца на правілы бясьпекі — не захоўваць фота з акцыяў пратэсту, каб не нашкодзіць сабе і іншым удзельнікам пратэстаў. Акрамя таго, людзей просяць уважліва праглядаць падпіскі ў сацыяльных сетках на наяўнасьць «экстрэмісцкіх» старонак, а таксама падабаек і камэнтароў да іх.
