З апублікаванага 4 красавіка рашэньня Менгарвыканкаму № 1169 (набывае сілу праз 5 дзён пасьля апублікаваньня) вынікае, што ў звычайных гарадзкіх аўтобусах, тралейбусах і трамваях у Менску цяпер за праезд трэба будзе аддаць 95 капеек, у мэтро — 1 рубель за паездку.
Адпаведна падаражэлі і праязныя білеты. Так, адзіны праязны на ўсе віды транспарту на 10 дзён будзе каштаваць 20,01 рубля, на 15 дзён — 30,01 рубля, на месяц — 56,97 рубля. Цяпер ён каштуе 17,93 рубля, 26,89 рубля і 51,05 рубля адпаведна.
Акрамя гэтага, менскія ўлады ўвялі шэраг іншых зьменаў па праязных. Так, цяпер у Менску будуць білеты на адзін і тры дні — іх стануць называць турыстычнымі. Варыянт на двое содняў зьнікне. Праязныя на 1 і 3 содняў будуць дзейнічаць як для наземнага транспарту, так і для мэтро (цяпер імі можна карыстацца ў аўтобусах, трамваях і тралейбусах, а ў мэтро — не). Турыстычны праязны на содні будзе каштаваць 4,81 рубля, а на трое — 14,43 рубля. Цяпер іх цана 4,2 і 10,23 рубля адпаведна.
Другая навіна — ня стане праязных на 100 паездак аўтобусамі, тралейбусамі, трамваямі. Максымум — на 60 паездак (цана такога праязнога вырасьце з 43,35 да 48,45 рубля). Таксама зьнікнуць варыянты на 20 і 50 паездак.
Праязны на адзін від транспарту будзе каштаваць 42,75 рубля для наземных відаў транспарту (з выняткам экспрэс-аўтобусаў) і 45 рублёў — для мэтро (цяпер 38,25 і 40,50 рубля адпаведна).
Згодна з рашэньнем Берасьцейскага аблвыканкаму № 259, апублікаваным 4 красавіка, тарыфы на праезд у грамадзкім транспарце павялічаныя на 10 капеек. Цяпер паездка ў аўтобусах і тралейбусах звычайных маршрутаў будзе каштаваць 90 капеек, а на экспрэсных — 1 рубель. Кошт кілямэтра ў прыгарадных маршрутах павялічылі на 1 капейку — ён складзе 11 капеек на звычайных маршрутах, 13 капеек — на хуткасных і дадатковых рэйсах, 14 капеек — на экспрэсных маршрутах. Рашэньне набывае сілу пасьля апублікаваньня.
Тамсама зацьвердзілі расцэнкі на праязныя білеты. У Берасьці яны будуць каштаваць ад 2,8 да 54,05 рубля залежна ад тэрміну дзеяньня і колькасьці відаў транспарту, у Баранавічах, Пінску і Кобрыні — ад 2,79 да 39,43 рубля, у астатніх гарадах — ад 2,43 да 34,42 рубля.
У Горадзенскай вобласьці рашэньнем аблвыканкаму № 156, апублікаваным 4 красавіка (набывае сілу пасьля апублікаваньня), цана паездкі ў звычайных маршрутах павышаецца да 90 капеек, а ў экспрэсных — да 1 рубля. Для прыгарадных аўтобусаў будуць дзейнічаць тарыфы 11 капеек за кілямэтар на звычайных маршрутах, 13 капеек — на хуткасных і дадатковых рэйсах, 14 капеек — на экспрэсных.
Праязныя білеты ў гарадах з насельніцтвам, большым за 250 тысяч чалавек, будуць каштаваць ад 14,25 да 43,21 рубля залежна ад колькасьці відаў транспарту і тэрміну дзеяньня, у гарадах ад 50 да 25 тысяч жыхароў — ад 13,86 да 39,43 рубля, у гарадах з насельніцтвам, меншым за 50 тысяч чалавек, — ад 18,14 да 34,42 рубля.
Раней цану праезду ў грамадзкім транспарце павысілі ў Менскай і Магілёўскай вобласьцях.
Форум