Паводле інфармацыі праваабаронцаў «Вясны», 20-21 сакавіка адбыўся масавы рэйд КДБ па розных гарадах Беларусі.
Па выніках рэйду частку людзей зьмясьцілі ў СІЗА КДБ. Вядома, што некаторым затрыманым інкрымінуюць «тэрарыстычныя» артыкулы, адзначае «Вясна».
Іншыя падрабязнасьці рэйду праваабаронцам пакуль не невядомыя. Правабаронцы просяць тых, каму вядомыя нейкія падрабязнасьці затрыманьняў, напісаць ім.
Беспрэцэдэнтныя палітычныя рэпрэсіі працягваюцца ў Беларусі з 2020 году. Агулам з 2020 году, паводле зьвестак праваабаронцаў «Вясны», сама меней 8 092 чалавекі сутыкнуліся з крымінальным перасьледам паводле палітычных матываў. У дачыненьні да прынамсі 6 673 чалавек былі вынесеныя палітычна матываваныя прысуды. Сама меней 33 чалавекі суды накіравалі на прымусовае лекаваньне. Па стане на 3 лютага, у Беларусі сама меней 1208 палітвязьняў, прызнаных праваабарончай супольнасьцю; пры гэтым рэальная колькасьць зьняволеных паводле палітычных матываў у краіне можа быць значна большай.
На працягу лютага 2025 году праваабаронцы зафіксавалі сама меней 656 выпадкаў палітычна матываваных рэпрэсій (у тым ліку затрыманьні, ператрусы і г.д.), якія вынікаюць з крымінальнага і адміністрацыйнага перасьледу. У дачыненьні да прынамсі 352 чалавек вынесеныя пастановы па адміністрацыйных справах. У тым ліку працягваліся ўзмоцненыя праверкі і затрыманьні пры перасячэньні мяжы зь Беларусьсю. Таксама вядома пра першыя затрыманьні пасьля атрыманьня спэцслужбамі доступу да чат-бота «Беларускі Гаюн», які зьбіраў інфармацыю аб перасоўваньні расейскай вайсковай тэхнікі па тэрыторыі Беларусі і іншай актыўнасьці, зьвязанай з уварваньнем Расеі ва Ўкраіну.
Форум