«Па лініі супрацьдзеяньня кібэрзлачынствам учора літаральна затрымалі чальцоў адной са злачынных групаў — гэта кол-цэнтар, які быў выяўлены на тэрыторыі Менску. Затрыманыя 37 чалавек, якія ўчынялі махлярствы», — паведаміў міністар унутраных спраў Беларусі Іван Кубракоў, яго цытуе Sputnik Беларусь.
Паводле Кубракова, у затрыманых канфіскавалі «значныя сумы грошай» і дарагія аўтамабілі.
Іх падазраюць ва ўчыненьні больш як 100 злачынстваў на тэрыторыі Беларусі і Расеі. Сьледчыя будуць працягваць расьсьледаваньне крымінальных спраў.
1 красавіка прэс-служба МУС Беларусі паведаміла пра арышт 43-гадовага менчука Паўла Алексяевіча, які, паводле ведамства, пазыцыянуе сябе як «злодзей у законе» па мянушцы Паштэт. Паводле МУС, затрыманы разам з 43-гадовым саўдзельнікам дапамагаў махлярскім кол-цэнтрам выводзіць скрадзеныя ў беларусаў грошы. Ці зьвязаныя гэтыя затрыманьні, невядома.
Гэта ня першы раз, калі беларускія ўлады паведамляюць пра арышт удзельнікаў ашуканскіх кол-цэнтраў. Так, у лістападзе 2024 году Сьледчы камітэт Беларусі паведаміў пра спыненьне дзейнасьці буйнога ашуканскага кол-цэнтру, работнікі якога падманным шляхам скралі грошы ў больш за 49 тысяч чалавек.
Паводле вэрсіі СК, у студзені 2020 году чатыры жыхаркі Пінску зарэгістравалі фіктыўную юрыдычную асобу нібыта для продажу тавараў праз інтэрнэт-краму, арандавалі памяшканьне, абсталявалі кол-цэнтар і нанялі больш за 100 супрацоўнікаў. Схема падману была наступнай: так званыя «кол-мэнэджары» тэлефанавалі беларусам па ўсёй краіне ад імя інтэрнэт-крамы «Тавары для дома» і паведамлялі пра выйгрыш кампутарнай тэхнікі, якую ім адправілі па пошце. «Пераможцаў» прасілі толькі аплаціць кошт перасылкі — па факце гэтыя грошы ішлі на рахункі фігурантак. Пасылкі для пацярпелых на пошту сапраўды прыходзілі, але замест выйгрышу ў іх ляжала рознае папяровае сьмецьце, каталёгі з таварамі і падарункавыя сэртыфікаты (скарыстацца якімі было немагчыма). Пасьля апэратары паведамлялі ашуканым, што тавараў няма на складзе, хоць у рэальнасьці ні інтэрнэт-крамы, ні складу не існавала. Шляхам падману афэрысткі завалодалі сумай больш за 2 млн рублёў, паведамілі ў СК.
Форум