2 красавіка Палата прадстаўнікоў у першым чытаньні прыняла законапраект аб унёсках у Фонд сацыяльнай абароны насельніцтва (ФСАН). Акрамя гэтага, адразу ў двух чытаньнях дэпутаты прынялі законапраект, які вызначае тэрмін забароны працаваць ІП тым, хто падчас працы індывідуальным прадпрымальнікам перавысіў гранічны памер выручкі.
З праекту закону «Аб зьмене законаў у пытаньнях дзяржаўнага сацыяльнага страхаваньня і пэнсійнага забесьпячэньня» з улікам заўваг і прапановаў, якія паступілі, выключылі:
- пункт аб узмацненьні жорсткасьці патрабаваньняў выплочваць унёскі ў бюджэт ФСАН для тых, хто працуе паводле цывільна-праўных дамоваў больш за 90 дзён у аднаго працадаўцы;
- пункт аб дыфэрэнцыйным памеры ўнёскаў у бюджэт ФСАН ад індывідуальных прадпрымальнікаў у залежнасьці ад атрыманых імі ў справаздачным годзе даходаў.
Таксама ў праекце закону скарэктавалі парадак выплаты пэнсіі (з нагоды страты карміцеля, па інваліднасьці) беларусам ва ўзросьце да 18 гадоў, асуджаным да пазбаўленьня волі.
У праект закону ўключылі нормы, якія дазволяць:
- прымаць для ІП — платнікаў падаходнага падатку з гадавым даходам, ніжэйшым за 12 мінімальных заработных платаў у якасьці базы, якая абкладаецца падаткам, фактычны гадавы даход;
- зьмяніць падыход да фармаваньня ападаткаванай базы для выплаты ўнёскаў у бюджэт ФСАН — крыніцай будуць зьвесткі Міністэрства падаткаў і збораў;
- спрасьціць падыход да адміністраваньня (цалкам скасаваўшы для ІП падачу дакумэнтаў пэрсаніфікаванага ўліку);
- утрымліваць на падставе рашэньняў камісіяў аб прызначэньні пэнсіяў залішне выплачаныя пэнсіянэру грошы з прычыны падліковай памылкі (гранічны памер такога ўтрыманьня на жаданьне пэнсіянэра можа быць на ўзроўні 5% пэнсіі).
Асноўныя навацыі законапраекту:
- удакладненьне катэгорыяў грамадзян, якія падлягаюць абавязковаму дзяржаўнаму страхаваньню;
- наданьне платнікам падатку на прафэсійны даход права даплачваць у бюджэт ФСАН унёскі на пэнсійнае страхаваньне для фармаваньня сваёй працоўнай пэнсіі;
- удакладненьне катэгорыяў платнікаў, якія выплочваюць абавязковыя страхавыя ўнёскі добраахвотна, — гэта грамадзяне, якія вядуць сваю гаспадарку і прадаюць лекавыя расьліны, дзікарослыя ягады, арэхі, іншыя плады, грыбы і інш.
- зьмена парадку разьліку пені на сумы нядоімкі, якая ўзьнікла пры разьліку (пераразьліку) дапамогаў у часовай непрацаздольнасьці (цяжарнасьці і родах);
- удакладненьне фармулёўкі вызначэньня аб’екту для налічэньня ўнёскаў на прафэсійнае пэнсійнае страхаваньне ў бюджэт ФСАН за грамадзян, якія працуюць;
- зьмена мэханізму рэгістрацыі натарыюсаў і адвакатаў;
- увядзеньне абавязку грамадзян вярнуць залішне выплачаныя сумы дадатковых прафэсійных пэнсіяў з прычыны падліковых памылак.
Пра забарону працягваць дзейнасьць ІП, якія перавысілі памер выручкі
Таксама Палата прадстаўнікоў у двух чытаньнях прыняла законапраект «Аб зьмене законаў у пытаньнях падаткаабкладаньня».
Раней у Падатковы кодэкс увялі норму аб падвышанай стаўцы падатку для індывідуальных прадпрымальнікаў, якія цягам году перавысілі гранічны памер выручкі ў 500 тысяч рублёў. Ім таксама забаранялі з 1 студзеня наступнага году працягваць дзейнасьць у якасьці ІП. Аднак тэрмін такой забароны ня вызначылі. Цяпер ён складзе 3 гады.
«У мэтах наданьня грамадзяніну „права на другі шанец“ у прадпрымальніцкай дзейнасьці законапраект прадугледжвае канкрэтызацыю пэрыяду, за які грамадзянін ня мае права працягваць дзейнасьць у статусе індывідуальнага прадпрымальніка, калі яго выручка за папярэдні год перавысіла 500 000 рублёў. Гэты пэрыяд уводзіцца на тры каляндарныя гады», — патлумачылі ў Палаце прадстаўнікоў.
Форум