Праваабаронцы «Вясны» прааналізавалі закрыцьцё інфармацыі аб судовых працэсах у Беларусі і патлумачылі прычыны гэтага кроку ўладаў.
Летам 2024 году рэжым ужо абмежаваў доступ да базы судовых пастановаў, якая дапамагала весьці статыстыку рэпрэсіяў, а цяпер ўлады пайшлі яшчэ далей у блякаваньні інфармацыі пра рэпрэсіі, мяркуюць праваабаронцы.
«Цяпер на сайце Вярхоўнага суду няма магчымасьці адсочваць расклад судовых пасяджэньняў у адміністрацыйных, цывільных і крымінальных справах. Сайтам карысталіся тысячы людзей з рознымі мэтамі, а таксама сваякі і блізкія абвінавачаных, якіх трымаюць пад вартай у чаканьні суду. Пры спробе адкрыць расклад на сайце паказваецца папярэджаньне: „праводзяцца рэглямэнтныя працы“. Таксама з сайту зьнік разьдзел „спэцыяльнае вядзеньне“, у якім публікавалі ня толькі інфармацыю пра будучыя завочныя суды над тымі, хто вымушана пакінуў Беларусь, але таксама і выніковыя часткі прысудаў», — заўважаюць праваабаронцы і ацэньваюць такія дзеяньні ўладаў як «прыхоўваньне інфармацыі пра палітычна матываваны перасьлед».
«Рэжым прыхоўвае катастрафічнае становішча з рэпрэсіямі»
«Вясна» прызнае, што празь перашкоды доступу да судовай інфармацыі стала складаней ацэньваць сытуацыю з правамі чалавека ў Беларусі. Але, на думку праваабаронцаў, улады краіны дамагліся адваротнага таму, чаго хацелі.
«У цяперашніх абставінах прыкладныя лічбы, якія маюць праваабаронцы, могуць сьведчыць не пра адлігу, а якраз наадварот — пра стабільна катастрафічнае становішча з рэпрэсіямі, якія так старанна хавае рэжым», — мяркуюць праваабаронцы «Вясны». Яны паваедамляюць, што дзякуючы неабыякавым беларусам маюць інфармацыю пра дзясяткі людзей, якія знаходзяцца ў сьледчых ізалятарах Беларусі ў палітычна матываваных крымінальных справах, заведзеных за апошнія паўгода.
«Людзей надалей перасьледуюць нібыта за «спробу захопу дзяржаўнай улады», за «спрыяньне ці ўдзел у экстрэмісцкім фармаваньні», а таксама працягваюць затрыманьні паводле «народнага» артыкулу 342 за ўдзел у акцыях пратэсту ў 2020 годзе, паведамілі вясноўцы.
Яны заклікалі «надалей паведамляць праваабаронцам пра ўсе вядомыя факты палітычнага перасьледу».
Юрыст «Вясны» Павал Сапелка заявіў, што праваабаронцы гарантуюць неразгалошваньне сваіх крыніцаў.
«Зрабіць свой унёсак у барацьбу з дзяржаўнай прапагандай можа кожны: паведаміце нам пра вядомага вам затрыманага ці асуджанага з палітычных матываў. Мы зьбіраем, правяраем і захоўваем гэтыя зьвесткі, а калі яны трапілі да нас пад умовай неразгалошваньня, выкарыстоўваем іх толькі ў статыстычных мэтах, не раскрываючы вядомых нам імёнаў і абставінаў».
Паводле праваабаронцы Натальлі Сацункевіч, праца з крыніцамі застаецца для «Вясны» прыярытэтнай:
«Для нас бясьпека ёсьць вялікаю каштоўнасьцю, таму мы зьбіраем і апрацоўваем інфармацыю так, каб гэта было бясьпечна для тых, хто нам паведамляе. Мы бачым вялікую каштоўнасьць інфармацыі і вялікі запыт ад усяго сьвету на дакладную інфармацыю пра тое, што адбываецца ў Беларусі».
Доступ да зьвестак пра абмежаваньні на выезд таксама абмежаваны
Праваабаронцы заўважылі, што з сайту Міністэрства ўнутраных справаў зьнікла магчымасьць праверыць, ці забаронены чалавеку выезд зь Беларусі. Калі менавіта адбылася гэтая зьмена, высьветліць немагчыма, адзначаюць праваабаронцы.
«Цяпер на сайце МУС праверку на абмежаваньні прыбралі. У беларусаў засталася магчымасць праверыць, ці ёсць абмежаваньне на выезд зь Беларусі, толькі пры асабістым звароце ў аддзел грамадзянства і міграцыі РУУС на месцы рэгістрацыі або фактычнага жыхарства», — паведамляюць вясноўцы.
«У выпадку з абмежаваньнем выезду мы агулам маем шмат шэрых зонаў і няпэўнасьці» — пракамэнтавала сытуацыю юрыстка «Вясны» Сьвятлана Галаўнёва.
Форум