Лінкі ўнівэрсальнага доступу

З сайту МУС зьнікла функцыя праверкі абмежаваньня выезду зь Беларусі. Пасьля розгаласу ў СМІ яе аднавілі

абноўлена

Пералік онлайн-сэрвісаў на сайце МУС, ілюстрацыйная выява
Пералік онлайн-сэрвісаў на сайце МУС, ілюстрацыйная выява

Функцыя праверкі наяўнасьці абмежаваньня на выезд зь Беларусі часова стала недаступнай на сайце МУС. Пасьля таго, як беларускія СМІ зьвярнулі на гэта ўвагу, працу онлайн-сэрвісу аднавілі без тлумачэньня прычын.

Раней, каб праверыць, ці абмежаваны пэўнаму чалавеку выезд зь Беларусі, яму трэба было зарэгістравацца ў асабістым кабінэце. 1 красавіка журналісты «Медиазоны» заўважылі, што функцыю праверкі абмежаваньня права на выезд прыбралі з сайту. Паводле зьвестак крыніцы рэдакцыі, гэтая функцыя адсутнічала прынамсі тыдзень.

Інфармацыя пра гэта шырока разышлася ў СМІ. Пасьля розгаласу 2 красавіка Міністэрства ўнутраных спраў Беларусі вярнула магчымасьць праверыць абмежаваньне на выезд зь Беларусі праз асабісты кабінэт на сайце, у разьдзеле для фізычных асобаў, заўважыла выданьне. Цяпер сайт міністэрства выглядае як і раней.

Ведамства не патлумачыла, чаму гэтая функцыя зьнікала.

Падчас спыненьня працы гэтага онлайн-сэрвісу адзінай магчымасьцю праверыць наяўнасьць ці адсутнасьць абмежаваньня на выезд з краіны для беларусаў заставалася асабіста зьвяртацца ў аддзел па грамадзянстве і міграцыі РУУС па месцы рэгістрацыі ці фактычнага пражываньня.

Раней СМІ заўважылі, што на інтэрнэт-партале Вярхоўнага суда Беларусі перасталі публікаваць расклад паседжаньняў судоў. На адпаведнай старонцы электроннага судаводзтва (service.court.gov.by) на сайце з 5 сакавіка можна пабачыць аб’яву «Сайт часова недасяжны, вядуцца рэглямэнтныя працы», тэрмін заканчэньня гэтых работ не пазначаны. У разьдзеле «Расклад паседжаньняў» больш за 5 гадоў разьмяшчалі расклады судовых працэсаў ва ўсіх судах Беларусі, паведамлялі прозьвішчы падсудных, інкрымінаваныя ім артыкулы, прозьвішчы судзьдзяў.

Таксама з сайту зьнік разьдзел «спэцыяльнае вядзеньне», у якім публікавалі ня толькі папярэднюю інфармацыю пра завочныя суды над тымі, хто не жыве ў Беларусі, але і выніковыя часткі прысудаў.

Раней з дапамогай гэтых паслуг праваабаронцы і СМІ маглі фіксаваць факты палітычных рэпрэсіяў у Беларусі.

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава
XS
SM
MD
LG