Францускі суд у панядзелак прызнаў лідэрку ўльтраправых Марын Лё Пэн вінаватай у прысваеньні сродкаў Эўразьвязу.
Згодна з вэрдыктам, як паведаміла агенцтва Reuters, Лё Пэн забаранілі на пяць гадоў займаць дзяржаўныя пасады пасьля абвінаваўчага прысуду ў справе аб хабарніцтве. Гэта азначае, што яна ня зможа ўдзельнічаць у прэзыдэнцкіх выбарах у 2027 годзе.
Сама Лё Пэн не дачакалася завяршэньня агучваньня выраку судзьдзём і сышла з залі.
Суддзі таксама прысудзілі Лё Пэн чатыры гады пазбаўленьня волі, зь іх два гады ўмоўна, і штраф у памеры 100 000 эўра.
СМІ паведамляюць, што лідэрка ўльтраправых Францыі імаверна будзе абскарджваць вырак, і пакуль яе апэляцыі не разгледзяць абвешчаны 31 сакавіка вырак ня мае юрыдычнай моцы. У той жа час, пяцігадовае пазбаўленьне права займаць дзяржаўныя пасады набывае моц неадкладна праз так званую меру «часовага адбыцьця пакараньня», запытаную пракуратурай, і будзе скасаваная толькі ў тым выпадку, калі апэляцыя будзе задаволена да выбараў.
Дэпутацкі мандат Лё Пэн захавае да заканчэньня яе паўнамоцтваў.
Прысуд пагражае перавярнуць францускую палітыку, бо Лё Пэн, кіраўніца скрайне правай партыі «Нацыянальнае аб’яднаньне» (RN), цяпер фаварытка апытаньняў пра галасаваньне на выбарах прэзыдэнта Францыі ў 2027 годзе.
Яе партыя назвала судовы працэс паляваньнем на ведзьмаў, а зьняцьце Лё Пэн з выбарчай гонкі распаліла б дыскусію аб тым, як судовая ўлада ўплывае на палітыку.
Жорсткі прысуд «выкліча значныя перашкоды, бо судзьдзі не дазволяць балятавацца галоўнаму лідэру апазыцыі», сказаў Арно Бэнэдэці, палітычны аналітык, які напісаў кнігу пра рост папулярнасьці RN.
Пракуратура прасіла неадкладна пазбавіць Лё Пэн права займаць дзяржаўныя пасады тэрмінам на пяць гадоў, калі яе прызнаюць вінаватай, незалежна ад таго, ці будзе абскарджаны вырак.
Абвінаваўчы прысуд з аўтаматычнай пяцігадовай дыскваліфікацыяй моцна ўдарыць па 56-гадовай Лё Пэн, тройчы кандыдатцы на выбарах прэзыдэнта, якая заявіла, што ў 2027 годзе будзе балятавацца на найвышэйшую пасаду астатні раз.
Лё Пэн абвінавачвае пракурораў у тым, што яны дамагаліся яе «палітычнай сьмерці», гаворыць аб «змове» з мэтай не дапусьціць RN да ўлады.
Пракурорам і судзьдзю, якія ўдзельнічаюць у судовым працэсе, у інтэрнэце пагражалі забойствам, паведамляе Reuters. Гэта праява ўсё мацнейшай міжнароднай рэакцыі на судзьдзяў, якія імкнуцца ўтаймаваць палітычныя злачынствы.
У чым вінавацяць Лё Пэн
Згодна з абвінавачаньнем, людзі, уладкаваныя на пасады памочнікаў дэпутатаў Эўрапарлямэнту ад «Нацыянальнага аб’яднаньня», насамрэч працавалі не на сваіх прадстаўнікоў у ЭЗ, а асабіста на Лё Пэн ці на яе партыю.
Агулам у справе праходзяць 27 чалавек. У выніку расьсьледаваньня, праведзенага ў канцы 2016 году двума парыскімі адмыслоўцамі ў фінансавых злачынствах, партыю западозрылі ў стварэньні «схемы крадзяжу» 21 тысячы эўра ў месяц, якія вылучае Эўразьвяз кожнаму эўрадэпутату для аплаты працы яго памочніка. Мэта, як сьцьвярджае абвінавачаньне, палягала ў тым, каб дамагчыся істотнай эканоміі заробкаў для чальцоў партыі, якая тады мела вялікія даўгі. Сьледчыя настойваюць на «сыстэмным характары крадзяжоў», якія сталі «сродкам фінансаваньня партыі» падчас эканамічных цяжкасьцяў, паведамляе Euronews.
Эўрапарлямэнт падаў цывільны пазоў, ацаніўшы шкоду амаль у сем мільёнаў эўра.
Абвінавачаным пагражае да 10 гадоў турмы і штрафы да аднаго мільёна эўра, а таксама пазбаўленьне грамадзянскіх правоў на пяць гадоў.
Марын Лё Пэн была лідэркай «Нацыянальнага аб’яднаньня» з 2011 па 2021 год. Яна тройчы кандыдавала на пасаду прэзыдэнта Францыі. У 2022 і 2017 гадах яна саступала Эманюэлю Макрону ў другім туры, у 2012 годзе заняла трэцяе месца ў першым туры прэзыдэнцкіх выбараў.
