Пра гэта паведаміла на сваёй старонцы ў Фэйсбуку яе маці Ганна Канавалава, якая знаходзіцца ў эміграцыі з двума ўнукамі. Яна апублікавала відэа сустрэчы Антаніны Канавалавай зь дзецьмі.
«Мы дачакаліся!!!
Пасьля 1555 дзён няволі...
Мы нарэшце змаглі абняцца!
Вельмі шаную, люблю кожнага з вас, хто дапамагаў мне і дзецям вытрымаць, а часам і выжыць. Я перад вамі ў неаплатным даўгу. Усіх абдымаю».
Пасьля затрыманьня 6 верасня 2020 году Канавалавай прысудзілі 5,5 года пазбаўленьня волі паводле ч. 2 і ч. 3 арт. 293 Крымінальнага кодэксу («масавыя беспарадкі»). Жанчыну абвінавачвалі ў адміністраваньні тэлеграм-каналу «Армія з народам» і ўва ўдзеле ў руху Сяргея Ціханоўскага «Краіна для жыцьця». З-за кратаў Антаніна Канавалава выйшла ў сьнежні 2024 году.
Яе ўнесьлі ў спісы датычных да «экстрэмісцкай» і «тэрарыстычнай» дзейнасьці. У зьняволеньні яна атрымала інваліднасьць трэцяй групы ў зроку.
У крымінальнай справе праходзіў таксама муж Канавалавай Сяргей Ярашэвіч. Паводле тых жа артыкулаў яго асудзілі на 5,5 года зьняволеньня. Пазьней яго прыгаварылі яшчэ да 9 месяцаў пазбаўленьня волі паводле арт. 411 КК («злоснае непадпарадкаваньне патрабаваньням адміністрацыі папраўчай установы»).
