Пра гэта Аляксандар Лукашэнка заявіў, выступаючы ў Савеце Фэдэрацыі Расеі, перадае РИА-Новости.
«Можа, мы і прыйдзем да адзінага парлямэнту, калі мы гатовы да гэтага» — сказаў ён.
Расейская «Парламентская газета» нагадвае, што з 1996 году функцыянуе Парлямэнцкі сход саюза Расеі і Беларусі, у які ўваходзяць па 36 парлямэнтараў ад кожнай з краінаў. Да выбараў у палату прадстаўнікоў саюзнай дзяржавы гэты орган выконвае функцыі парлямэнту, адзначана ў дамове аб стварэньні саюзнай дзяржавы ад 1999 году.
Выданьне нагадвае, што ў 2023 годзе пры абмеркаваньні праграм саюзнай дзяржавы ідэя заснаваньня адзінага парлямэнту Беларусі і Расеі была адкінутая, «Мы катэгарычна сказалі „не“» — цытуе выданьне тагачасную заяву Лукашэнкі.
Таксама ў сваім выступе Лукашэнка заявіў, што пры будаўніцтве так званай «саюзнай дзяржавы» ня варта дабівацца аб’яднаньня Расеі і Беларусі ў адной дзяржаве.
«Слухайце, а чаго вы хочаце (ад саюзнай дзяржавы), чаго? Калі Расея ўвойдзе ў склад Беларусі або, наадварот, Беларусь увойдзе ў склад Расеі? Гэта наўрад ці будзе неўзабаве. І калі мы будзем у гэтым пляне ламіцца ў гэтыя адчыненыя дзьверы, мы загубім усё, што мы зрабілі», — сказаў Лукашэнка.
Паводле яго, «варта ісьці спакойна, крок за крокам, нешта рэалізоўваць, як мы робім цяпер».
Форум